अबको कांग्रेस सभापति र प्रधानमन्त्री शेखर कोइराला : सुजाता

काठमाडौं – सत्तारुढ नेपाली कांग्रेसकी नेत्री सुजाता कोइरालाले अबको पार्टी सभापति र प्रधानमन्त्रीमा डा. शेखर कोइरालालाई प्रस्ताव गरेका छन् । आज (सोमबार) जीपी फाउन्डेसन भक्तपुरको कार्यक्रममा बोल्दै उनले अब कांग्रेस सभापति र प्रधानमन्त्री दुवै डा. कोइराला हुने जिकिर गरेका हुन् ।

कांग्रेसलाई भूमिकाविहीन बनाइएको र देश विकासको श्रेय प्रधानमन्त्री केपी शर्मा ओलीलाई दिइएको भन्दै उनले यस्तो अवस्थामा पुर्‍याउने शेरबहादुर देउवालाई प्रधानमन्त्री र सभापति कुनै पनि पदमा अब स्वीकार नगर्ने उद्घोष गरे ।

‘कांग्रेसलाई यो अवस्थामा पुर्‍याउनेलाई अब कुनै पनि रूपमा अघि बढाउन सकिँदैन’, सुजाताले भने, ‘अबको प्रधानमन्त्री शेखर कोइराला हो, अबको कांग्रेसको सभापति पनि डा. शेखर कोइराला नै हो ।’ उनले फाउन्डेसन राजनीतिक फोरम नभए पनि आफूले यहीँबाट यस्तो घोषणा गरेको बताए ।

देशमा प्रजातन्त्र कमजोर रहेको र कांग्रेस भूमिकाविहीन अवस्थामा देखिएको उनले टिप्पणी गरे । ‘देशमा प्रजातन्त्र एकदम कमजोर भएको छ । यो देश कांग्रेसले हाँकेको छैन, ओलीजीले लिड गरिराख्नु भएको छ । शेरबहादुरजी स्याडोमा हुनुहुन्छ । उहाँ (देउवा) दिनभर केमा भुलिरहनु भएको छ मैले बुझ्न सकेको छैन’, उनले भने, ‘विकास निर्माणका केही काम भइरहेका छन्, तर त्यसको श्रेय ओलीजीले एक्लै लिइराख्नु भएको छ ।’