ओलीका मन्त्रीको किल्लामा प्रचण्ड–माधव समूहको कार्यक्रमः जिल्ला कमिटीका दुई तिहाई सदस्य सहभागी

स्याङ्जा । नेपाल कम्युनिष्ट पार्टीको प्रचण्ड–माधव नेपाल समूहको जिल्लास्तरीय अगुवा कार्यकर्ता भेला तथा प्रशिक्षण कार्यक्रम स्याङ्जामा भब्यरुपमा सफल भएको छ । आइतबार सम्पन्न जिल्ला कार्यकर्ता भेलामा १ सय ४५ सदस्यीय जिल्ला कमिटीका ८५ जना उपस्थित थिए । प्रचण्ड–माधव नेपाल समूहको जिल्ला भेलामा नजान कृषि मन्त्री पदमा अर्यालले उर्दी जारी गर्दा पनि उल्लेख्य उपस्थितिमा नेता कार्यकर्ता उपस्थित भएका थिए ।

मन्त्री अर्यालले राज्यशक्तिको दुरुपयोग गर्दै उक्त भेलामा नजान फकाउने र तर्साउने दुवै हत्कण्डा प्रयोग गरेकी थिइन् । भेलामा नजानका लागि पद प्रतिष्ठाको प्रलोभन समेत उनले दिंदा पनि जिल्ला कमिटीका दुईतिहाई सदस्य उपस्थित भएपछि उनको हत्कण्डा असफल भएको छ ।

 कार्यकर्ता भेलालाई नेकपाका नेताहरु हितराज पाण्डे र सोभियत ढकालले सम्बोधन गरेका थिए । १४५ सदस्यीय जिल्ला कमिटीमा ८५ जना प्रचण्ड–माधवको कार्यक्रममा उपस्थित भएपछि ओली नेतृत्वको नेकपा स्याङ्जामा कमजोर देखिएको छ ।  

ओली नेतृत्वको १११९ सदस्यीय महाधिवेशन आयोजक समितिमा राखिएका मीनप्रसाद कोइराला र गल्याङ नगरपालिकाकी उपमेयर देवी थापाले पनि उक्त पद अस्वीकार गरी प्रचण्ड–माधवतिरै देखिएका छन् ।