एक नम्बर प्रदेशको सरकार संकटमा, सांसद खरिदबिक्रीको खेल सुरु

शेरधन राई र अम्बिरबाबु गुरुङ

बिराटनगर । प्रदेश नम्बर १ का १ मन्त्री र २ राज्यमन्त्रीले राजीनामा दिएका छन् । शनिबार प्रदेश १ का आर्थिक मामिला तथा योजना मन्त्री इन्द्र आङ्बोलाई मुख्यमन्त्री शेरघन राईले हटाएपछि आज सामाजिक विकास मन्त्री जीवन घिमिरेले पनि राजीनामा दिएका छन् ।

सामाजिक विकास राज्यमन्त्री जसमाया गजमेर र उद्योग, पर्यटन वन तथा वातावरण राज्यमन्त्री विजय कुमार विश्वासले पनि राजीनामा दिएका छन् । यो राजीनामासँगै १ नम्बर प्रदेश सरकार पनि संकटमा परेको छ । नेकपाको विभाजनसँगै १ नम्बर प्रदेशमा पनि मुख्यमन्त्री शेरधन राईबिरुद्ध अविश्वास प्रस्ताव दर्ता हुने भएको छ । शुक्रबारै अविश्वास प्रस्ताव दर्ता गर्ने तयारीमा प्रचण्ड माधव नेपाल समूह लागेको थियो ।

१ नम्बरमा प्रचण्ड– नेपाल समूह ओली समूहभन्दा धेरै शक्तिशाली छ । लगभग बहुमत नै पुग्ने संख्या प्रचण्ड–माधव समूहसँग छ । बहुमत पुग्न ४७ जना प्रदेश सासद भए पुग्छ । प्रचण्ड–नेपाल समूहसँग बहुमत संख्या देखिएपछि सांसद किनबेचको खेल पनि एक नम्बर प्रदेशमा ओली समूहले सुरु गरेको छ । मुख्यमन्त्री राईको सत्ता जोगाउन उनको मन्त्रिपरिषदका भौतिक राज्यमन्त्री अम्बिर गुरुङ सांसद किनबेचको लागि सक्रिय भइसकेका छन् । यसअघि माधव नेपाल पक्षको संख्या बढी हुँदाहुँदै पनि २ जनाभन्दा बढी सांसद अम्बिर गुरुङले नै खरिद गरी शेरधन राईलाई संसदीय दलको नेता बनाई मुख्यमन्त्री बनाइएको थियो ।

भीम आचार्यलाई ससदीय दलको नेतामा हराउन सांसद किनबेच गरेबापत अम्बिरबाबु गुरुङलाई शेरधन राईले राज्यमन्त्री बनाएका थिए । गुरुङले पुराना कम्युनिष्ट नेता कृष्णराज बर्मा लगायत धेरै जनाको घरजग्गादेखि रकम समेत नतिरी ठगी गरेको आरोप छ । तर सत्ताको आडमा उनलाई उजुरी पर्दा पनि प्रहरीले पक्राउ गर्नसकेको छैन ।