सहरी विकासमा सिग्देल आएपछि ठेकेदारहरूलाई सास्ती

धनकुटा ।  सडक विभागको महानिर्देशकदेखि भौतिक पूर्वाधार मन्त्रालयको सचिव हुँदा ठेकेदारहरुसँग सेटिङमा कहलिएका गोपालप्रसाद सिग्देलले सहरी विकास मन्त्रालयको सचिव भएर आएपछि पनि निर्माण ब्यवसायीहरुलाई सास्ती दिन थालेका छन् ।

धरहरा निर्माणको ठेक्का लिएको रमण कन्ष्ट्रक्सनका संचालक पवन महतोले दुःख पाइरहेको समयमा जिल्ला अस्पताल संखुवासभा, खाँदबारीका ठेकेदार पनि सचिव सिग्देल र भवन बिभागका अधिकारीहरुसँग वाक्कदिक्क भएका छन् । एकाध करोडको भेरियसन अर्डर (भीओ) र म्यादथप नगर्दा खाँदबारी अस्पताल निर्माण पूरा हुन सकेको छैन ।

जिल्ला अस्पताल भवन निर्माणको ठेक्का लिएको स्वामीनारायण कन्ष्ट्रक्सन जेभीले कोभिड महामारी लगायतका कारण देखाउँदै तोकिएको समयमा अस्पतालको भवन निर्माण गर्न नसकेको कारण देखाउँदै म्यादथप र भेरियसन अर्डर(भीओ)को माग गरेको छ ।

५ महिनादेखि म्यादथप र भीओ स्वीकृतिका लागि सघन सहरी तथा भवन निर्माण आयोजना धनकुटाका प्रमुख सुमन मिश्र पटक–पटक विभाग र मन्त्रालय धाए पनि आवश्यक कारबाही अगाडि बढेको छैन । भीओ र म्यादथपका लागि पटक पटक धाउँदा पनि मन्त्रालयबाट आवश्यक सहयोग नपाउँदा आयोजना प्रमुख मिश्र दिक्क भएको गुनासो गर्दैआएका छन् ।

म्यादथप र भीओ स्वीकृत गरेर अस्पतालको निर्माण छिटो गराउनेतिर भन्दा पनि पनि मन्त्रालय र विभागका कर्मचारीहरुले कमिसनको लोभ गर्दा आयोजना प्रमुख मिश्र त वाक्क भएर जागिर नै छाडिदिन्छु भन्न थालेका छन् । एकाध करोडको भीओ स्वीकृतिमा समेत विभाग र मन्त्रालयका कर्मचारीहरुले कमिसनमा लोभ गरी काम रोकिदिएको आरोप छ ।

ठेकेदार कम्पनी स्वामीनारायण जेभीका संचालक सन्तोष बस्नेतसमेत आयोजना प्रमुख मिश्रसँग पटक पटक म्यादथपका लागि बिभाग र मन्त्रालयतिर धाइरहेका छन् । तर पटक पटक धाउँदा पनि काम हुनसकेकोे छैन ।

जिल्ला अस्पताल संखुवासभामा भोजपुरका समेत बार्षिक करिव ७० हजार विरामी उपचार गर्न आउँछन् । बिरामीको चाप बढी भएकाले अस्पतालको स्तरोन्नति गरी नयाँ भवन बनाउने गरी ८ बर्षअघि ठेक्का दिइएको थियो । नयाँ भवन निर्माण पूरा नहुँदा अस्पतालको सेवा ४ दशक अघि बनेको पुरानै भवनबाट सञ्चालन भइरहेको छ ।

जिल्ला अस्पताल संखुवासभा ५० बेड क्षमताको अस्पताल हो । ५० बेडको स्वीकृति पाएको अस्पतालमा उपचार गर्ने बेड १५ वटामात्रै छन् । स्तरोन्नति सँगै नयाँ भवन निर्माण थालेको ८ बर्षसम्म पूरा हुन सकेको छैन ।

५० बेडमा स्तरोन्नति भएलगत्तै सुबिधा सम्पन्न भवन निर्माण सुरु गरिएको थियो । तर कहिले कोरोना महामारी त कहिले म्यादथपमा बिलम्ब हुँदा अस्पताल निर्माण अधुरै छ । खाँदबारी अस्पताल २८ करोड रुपैयाँ लागतमा निर्माण सुरु भएको हो ।