सहरी विकास मन्त्रालयको सरुवामा मैनालीको चलखेल, बदर हुने भएपछि घुस फिर्ता गनुपर्ने बाध्यता

काठमाडौं । निवर्तमान सहरी विकास मन्त्री प्रकाशमान सिंहको बहिर्गमनको संघारमा गरेको मन्त्रालय मातहतका कर्मचारीको सरुवा विवादमा परेको छ । सहरी विकास मन्त्रालयका प्रवक्ता तथा कर्मचारी प्रशासन महाशाखा प्रमुख नारायण मैनालीले आर्थिक चलखेलमा सरुवा गरेकाले बहुसंख्यक कर्मचारीहरु असन्तुष्ट छन् । जसले गर्दा उनले सरुवामा लिइसकेको घुस फिर्ता गर्नुपर्ने बाध्यता आएको छ ।

निवर्तमान ऊर्जा मन्त्री दीपक खड्काले जेनजी समूहको प्रदर्शनकै दिन भदौ २३ गते राति गरेको उपसचिव र सहसचिवहरुको सरुवा मुख्यसचिव एकनारायण अर्यालले बदर गर्न निर्देशन दिइसकेका छन् । ऊर्जा मन्त्रालयको जस्तै भदौ अन्तिममा भएको सहरी विकास मन्त्रालयका सरुवा पनि बदर हुने संभावना प्रबल देखिएको छ ।

प्रकाशमान सिंहले सहरी विकास छाड्नै लागेको बेला मन्त्रालयले २६ जना डिभिजन इञ्जिनियहरुको सरुवा गरेको थियो । त्यसमा ४/५ जनाको सरुवा मैनालीको चाहनामा गरिएको थियो । अब त्यो सरुवा कार्यान्वयन नहुने भएको छ । सरुवा कार्यान्वयन नहुने स्थिति आएपछि मैनालीलाई घुस दिई आकर्षक डिभिजन कार्यालयमा सरुवा गरिएका इन्जीनीयहरुले घुस माग्न थालेका छन् । सरुवा बदर हुने भएपछि मैनाली ठूलो दबाबमा परेका छन । सिंहले मन्त्रालय छाडेपछि सहरीमा मैनालीको राज समाप्त हुने भएको छ ।

सिंह र सिंहनिकट व्यक्तिहलाई खुशी गराउन मैनालीले चरम राज्यदोहन गरेका थिए । मन्त्रालयमा मन्त्रीका लागि भनेर चियाखाजामा मात्रै महिनाको एक/दुई लाख खर्च हुने गथ्र्योे । भवन विभाग परिसरभित्र मन्त्री सिंहका लागि भनेर मैनालीले ५० लाख रुपैयाँ खर्च गरेर भव्य कार्यकक्ष बनाएका थिए । त्यो कार्यकक्षमा मन्त्री सिंह कहिले गएनन् । बरु त्यो कार्यकक्षमा मैनाली आफंै पुगेर कर्मचारीहरुसँग घुस बार्गेनिङ गर्ने गरेको आरोप लाग्दैआएको छ । आफू पनि खाँटी कांग्रेस भएको भन्दै मैनाली सहरीमा दोहर्‍याएर आउन सफल भएका हुन् । यसअघि उनी सिता गुरुङ सहरी विकास मन्त्री हुँदा गुरुङको सचिवलायमा कार्यरत थिए ।

उपसचिवबाट सहसचिवमा बढुवा भएपछि उनको पहिलो आँखा सहरीमै लाग्यो । सहरीमा आउन उनले कांग्रेसका एक शीर्षनेतालाई प्रभावमा पारेका थिए । केपी शर्मा ओली नेतृत्वको सरकार ढल्नेवित्तिकै मैनालीको बोली फेरिएको छ । ‘कर्मचारी कहिल्यै पार्टीका मान्छे हुँदैनन्, प्रोफेसनल हुन्छन्’ भन्न थालेका छन् । जबकि सिंह सहरी विकास मन्त्री भएको बेला उनले आफू ठूलो कांग्रेस भएको घोषणा गरेका थिए ।

त्यतिबेला मन्त्रालयमा आफूले भनेको नमान्ने कर्मचारीलाई छानीछानी दुःख दिने गर्थे । आफूनिकट कर्मचारीहरुलाई भने सधैं अवसर दिने गर्थे । दोहोर्‍याएर तेहर्‍याएर विदेश पठाउने गर्थे । यहाँसम्म कि, मन्त्रालयमा कार्यरत केही महिला कर्मचारीहरुले मैनालीको ब्यवहारका बारेमा गुनासो गर्ने गरेका छन् । तर यो कुरा उनीहरुले मन्त्रालयमा सचिवलाई सुनाउन सकेका छैनन् । किनभने मन्त्रालयका सचिव गोपालप्रसाद सिग्देल आफैैं मैनालीसँग डराउने गर्थे । त्यतिबेला मैनालीलाई केही भन्ने वित्तिकै आफनो सरुवा हुन्छ भन्ने डर सिग्देलाई थियो ।

अब सचिव सिग्देल मैनालीसँग टाउको ठाडो गरेर बोल्न सक्ने हैसियतमा आएका छन्– एक कर्मचारी भन्छन् । एक महिला कर्मचारी भन्छिन्-‘त्यतिबेला मैनालीको विषयमा गुनासो गर्ने वित्तिकै उल्टै हामीले दुःख पाउने स्थिति थियो । अनावश्यक झन्झट हामीमाथि आउन सक्थ्यो । त्यसैले केही बोल्न सकेका थिएनौं । अब केही परिवर्तन हुन्छ कि भन्ने आशा गरेका छौ ।’

सहसचिव बिनु बज्रचार्यलाई मन्त्रालयबाट अन्य सरुवा गर्न लगाएर उनको ठाउमा मैनाली पुगेका थिए । एक उच्च कर्मचारी भन्छन्–‘सहरी विकास मन्त्रालय मेरो नै हो, जीवनभरी म यहीँ बस्छु जस्तो गरेर राज गरिरहनुभएको छ । अब उहाँको राज समाप्त हुनैपर्छ ।’