ओलीपक्षकाे केन्द्रीय कमिटी बैठक बालुवाटारमा जारी, पूर्वमाओवादीका रायमाझी र थापापनि सहभागी

काठमाडौं । नेपाल कम्युनिस्ट पार्टी (नेकपा) का अध्यक्ष तथा प्रधानमन्त्री केपी शर्मा ओलीले डाकेको केन्द्रीय कमिटी बैठक बालुवाटारमा सुरु भएको छ । बालुवाटार स्रतोका अनुसार ओलीले डाकेको बैठक भर्खरै सुरु भएको हाे । बैठकमा ओली पक्षका केन्द्रीय सदस्यहरु सहभागी छन् ।

पार्टी फुट्ने अवस्थामा पुगेपछि अब के गर्ने भन्ने विषयमा ओलीले आफू निकटका केन्द्रीय सदस्यसँग छलफल गर्न बैठक बोलाइएकाे हाे ।

ओली निकट १ सय ४० जना केन्द्रीय सदस्य रहेको बताइएको छ । पार्टीभित्र देखिएको विवाद उत्कर्षमा पुगेपछि नेकपाका दुई अध्यक्षले आज छुट्टा छुट्टै केन्द्रीय कमिटी बैठक डाकेका हुन् । ओली पक्षधरले बोलाएको केन्द्रीय कमिटी बैठकमा पूर्वमाओवादीका तीन स्थायी कमिटी सदस्य पनि सहभागी बनेका छन् ।

स्थायी कमिटी सदस्यत्रय लेखराज भट्ट, टोपबहादुर रायमाझी र मणि थापा बालुवाटार बैठकमा सहभागी हुन पुगेका हुन्। हिजोसम्म कतै नखुलेका रायमाझी र थापा पनि बैठकमा सहभागी भएको बैठक बालुवाटारमा जारी छ।

दाहाल-नेपाल समुहको बैठक भने दिउँसो १ बजेका लागि बोलाइएको छ । आइतबार प्रधानमन्त्री ओलीले संसद विघटन गरेपछि नेकपा विवाद चरम उत्कर्षमा पुगेको छ ।