आज ओली निकटका नेताहरूको भेला हुँदै

काठमाडौं। प्रधानमन्त्री एवं नेपाल कम्युनिष्ट पार्टीका अध्यक्ष केपी शर्मा ओलीले आफू निकटका नेताहरूलाई बालुवाटार बोलाएका छन् ।

ओलीले आज  बिहान ९ बजे प्रधानमन्त्री निवास बालुवाटारमा आफू निकटका नेताहरूलाई बोलाएर तत्कालिन परिस्थितिका बारेमा छलफल गर्ने भएका छन् ।। भेलामा ओली निकटका विघटित प्रतिनिधिसभाका सांसद, स्थायी कमिटी सदस्यहरु र केन्द्रीय नेताहरूको उपस्थिति हुने स्रोतले जानकारी दिएको छ ।
 
मन्त्रिपरिषद्को सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेकी थिइन् । नेकपाको स्थायी समिति बैठकले अध्यक्ष ओलीलाई अनुशासनको कारबाही गर्ने प्रस्ताव केन्द्रीय कमिटीमा लैजाने निर्णय गरेको छ । केन्द्रीय कमिटी बैठक पुस ७ गते बोलाउने निर्णय गरिएको छ ।

संविधानविदहरुले भने संविधानले ओलीलाई संसद विघटनको अधिकार नदिएको बताइरहेका छन् । सर्वोच्च अदालतले संसद विघटनको निर्णय खारेज गर्ने उनीहरुको मत छ । आइतबार नै संसद् विघटनको निर्णयविरुद्ध सर्वोच्चमा तीन वटा रिट निवेदन पेस भएका छन् ।