पूर्वमाओवादी खेमाका मन्त्रीले राजीनामा दिने, घनश्याम भूसाल र योगेश भट्टराईलाई संकट

काठमाडौं । प्रधानमन्त्री केपी शर्मा ओलीले आइतबार बिहान संसद विघटन गर्न राष्ट्रपति समक्ष सिफारिस गरेपछि राजनीतिक घटनाक्रम तीव्र रुपमा विकास भएको छ । राष्ट्रपति विद्या भण्डारीले प्रधानमन्त्रीको सिफारिसबमोजिम आगामी बैशाख २१ र २७ मा प्रतिनिधिसभाको निर्वाचनको मिति घोषणा गरी संसद विघटन गरेकी छन् ।

नेपाल कम्युनिष्ट पार्टीलाई जनताले २०७४ मंसिरमा भएको निर्वाचनमा झन्डै दुईतिहाई बहुमतका साथ सरकारमा पठाएका थिए । स्थीर सरकारको चाहनाका साथ जनादेश दिए पनि प्रधानमन्त्री ओलीले ३ बर्षमै संसद विघटन गरेका छन् । पार्टीमा स्पष्ट अल्पमतमा परेका ओलीले संसद अधिवेशन बोलाउनासाथ आफूलाई अविश्वास प्रस्ताव ल्याएर प्रधानमन्त्रीबाट हटाउने संभावना देखेपछि संसद नै विघटन गर्ने असवैधानिक बाटो रोजेका छन् ।

प्रधानमन्त्री ओलीले संसद विघटन गरेपछि पूर्वमाओवादीतर्फका ५ मन्त्रीलाई राजीनामा दिन नेकपा अध्यक्ष प्रचण्डले निर्देशन दिएका छन् । गृहमन्त्री रामबहादुर थापा, उद्योग मन्त्री लेखराज भट्ट  शिक्षामन्त्री गिरिराजमणि पोखरेल, ऊर्जामन्त्री बर्षमान पुल, वनमन्त्री शक्तिबहादुर बस्नेत, खानेपानी मन्त्री विना मगर, श्रममन्त्री रामेश्वर यादवलाई राजीनामा दिन निर्देशन दिएका छन् ।अध्यक्ष प्रचण्डले निर्देशन दिए पनि पूर्वमाओवादी खेमाका उद्योग मन्त्री लेखराज भट्टले राजीनामा नदिने एकीन छैन । 

माधव नेपाल पक्षबाट मन्त्री नै छैनन् । उनको टीमबाट महाधिवेशनमा उपमहासचिव र सचिव जितेका घनश्याम भूसाल र योगेश भट्टराईलाई पनि राजीनामा दिन दबाब परेको छ । नेकपाका बरिष्ठ नेता झलनाथ खनालले ओलीको मन्त्रिपरिषदबाट राजीनामा दिन नेकपाका मन्त्रीहरुलाई निर्देशन दिएका छन् ।