संवैधानिक परिषद्को बैठकमा देउवा नजाने

काठमाडौं । प्रधानमन्त्री केपी शर्मा ओलीले बिहीबार साँझ संवैधानिक परिषद्को बैठक बोलाएका छन् । तर प्रमुख प्रतिपक्ष दल नेपाली कांग्रेस सभापति देउवा भने बैठकमा नजाने भएका छन् ।

प्रधानमन्त्री ओलीले बुधबार सत्तारुढ दल नेपाल कम्युनिस्ट पार्टी (नेकपा)मा अध्यादेश फिर्ता लिने सहमति गरेका थिए । नेकपा स्थायी कमिटीले पनि अध्यादेश फिर्ताको निर्णय गरेको थियो । तर अध्यादेश फिर्ता लिने सहमति गरेकै भोलिपल्ट प्रधानमन्त्री ओलीले संवैधानिक परिषद्काे बैठक बोलाएका हुन् ।

विपक्षी दलका नेता शेरबहादुर देउवालाई साँझ ५ बजे बैठकका लागि बोलाइएको उनी निकट स्रोतले बताएको छ । बैठक किन बोलाइएको भन्ने खुलेको छैन । यसअघि जस्तो औपचारिक पत्र पठाउनुको साटो टेलिफोनबाटै बैठकको सूचना दिइएको छ ।

प्रधानमन्त्री अध्यक्ष रहने संवैधानिक परिषदमा सभामुख, राष्ट्रियसभाका अध्यक्ष, प्रधानन्यायाधीश, विपक्षी दलका नेता र उपसभामुख सदस्य रहन्छन् । परिषदले विभिन्न संवैधानिक अंगका पदाधिकारी नियुक्तिका लागि सिफारिस गर्ने गर्छ ।