संवैधानिक परिषदमा देउवा नजानेः प्रधानन्यायाधीशलाई नैतिक संकट, ओली एक्लिए

काठमाडौं । संवैधानिक परिषद सम्बन्धी अध्यादेश जारी भएसँगै संवैधानिक परिषदको बैठकबाट बहुमतीय आधारमा अख्तियार दुरुपयोग अनुसन्धान आयोगलगायत संवैधानिक निकायका पदाधिकारी नियुक्ति गर्ने प्रधानमन्त्री केपी शर्मा ओलीको चाहना विपक्षी दलका नेता शेरबहादुर देउवाले पूरा हुन नदिने भएका छन् ।

आज बसेको मन्त्रिपरिषद बैठकले पठाएलगत्तै राष्ट्रपति विद्यादेवी भण्डारीले संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश, २०७७ जारी गरेपछि परिषद बैठकमा आउने बचन दिएका देउवा बिच्किएका छन् । उनले केहीबेरअघि परिषद बैठकमा भाग नलिने घोषणा गरेका छन् । अब संवैधानिक परिषदमा प्रधानमन्त्री ओली, प्रधानन्यायाधीश चोलेन्द्रशमशेर राणा र राष्ट्रियसभाका अध्यक्षमात्र रहेका छन् ।

विवादित बैठकमा प्रधानन्यायाधीश पनि जाने संभावना कम छ । संसद छलेर अध्यादेश ल्याई संवैधानिक नियुक्ति गर्न खोजपछि देउवा समेत बिच्किएका हुन् ।