रौतहट, २ बैसाख । नेपाल–भारत खुला सीमाका कारण पनि कोरोना संक्रमण भित्रिएको छ । रौतहटको ईशनाथ नगरपालिकामा कोरोना भाइरस संक्रमण देखिएका युवक भारतको राजधानी दिल्लीबाट फर्केको पाइएपछि यसको पुष्टी भएको हो । उनी लकडाउनका बीच राति राति खुला सीमा हुँदै घर आएका थिए ।
भारतको राजधानी दिल्लीस्थित पहाडगञ्जको एउटा ब्याग कारखानामा काम गर्ने १९ वर्षीय युवकलाई कोरोना भाइरसको संक्रमण देखिएको हो । संक्रमित युवकसँगै ईशनाथका ३ जना दिःलीबाट फर्किए । अन्य तीन जनाको रिपोर्ट भने निगेटिभ आएको छ ।
पर्याप्त जनशक्ति नहुँदा ने यसरी छिर्ने क्रम नरोकिएपछि पहाडी तथा हिमाली जिल्लामा कार्यरत सशस्त्र प्रहरीलाई समेत सीमामा खटाउन गृह मन्त्रालयले निर्देशन दिएको छ । गृहमन्त्री रामबहादुर थापा बादलले भिआईपीको सुरक्षामा खटिएकालाई समेत सीमामा खटाउन निर्देशन दिएका छन् ।
सशस्त्र प्रहरी बलका आइजीपी शैलेन्द्र खनालले तराईको फौजलाई पहाडमा थुपारेका थिए । तर अहिले सीमा क्षेत्रबाट कोरोना संक्रमित राति समेत भित्रिएको रौतहटको घटनाले पुष्टी गरेको छ । गृह मन्त्रालयले ९ सय २५ पोष्टमार्फत् सीमामा निगरानी भइरहेको जनाएको छ । तर, जनशक्ति पर्याप्त नहुँदा भारतबाट छिर्ने क्रम नरोकिएपछि गृहले सुरक्षाकर्मी थप्न लागेको हो । नेपाल–भारत सीमामा काँडेतार लगाउनुपर्छ भन्नेहरुलाई राष्ट्रवादीको आरोप लगाइए पनि कोरोना महामारीले खुला सीमा जोखिमपूर्ण रहेछ भन्ने पुष्टी गरेको छ ।
