राष्ट्रिय अनुसन्धान विभागका थापालाई हटाउँदै सरकार, नयाँ प्रमुखमा कार्कीको चर्चा

काठमाडौं । सरकारले राष्ट्रिय अनुसन्धान विभागका प्रमुख हुतराज थापालाई हटाउने भएको छ । स्रोतका अनुसार विभागका प्रमुख थापाको कार्यक्षमतामाथि प्रश्न उठाउँदै उनलाई हटाउन लागेको हो ।
थापालाई हटाएर टेकेन्द्र कार्कीलाई राष्ट्रिय अनुसन्धान विभागको प्रमुख बनाउन लागिएको छ ।

प्रधानमन्त्री केपी ओलीले गएको भदौ १० गते राष्ट्रिय अनुसन्धान विभाग, राष्ट्रिय सतर्कता केन्द्र, सम्पत्ति शुद्धीकरण विभाग र नेपाल ट्रस्टको कार्यशैलीबारे चरम असन्तुष्टि पोखेका थिए । त्यो असन्तुष्टि पोखेलगत्तै उनले राजस्व अनुसन्धान विभागकोा महानिर्देशकमा आफ्नै जिल्ला झापा घर भएका चण्डीप्रसाद घिमिरेलाई लगेका छन् । जसको जागिर अवधि ७ महिना पनि पूरा छैन । अवकाशको मुखमा उनलाई राजस्वको महानिर्देशकमा लगेर उनलाई कस्तो प्रतिफल खोजेका हुन् भन्ने प्रश्न पनि उठिरहेको छ ।

सम्पत्ति शुद्धीकरण अनुसन्धान विभागको महानिर्देशकमा पनि सुमन दाहाललाई लगिएको छ । सम्पत्ति शुद्धीकरण विभागका सबै १४ वटा अधिकार झिकेकाले उक्त विभागको औचित्य नभएकोले दाहाल जान इच्छुक थिएनन् । विभागलाई प्रधानमन्त्री कार्यालयको महाशाखाको रुपमा राख्न सुझाव दिएपछि महानिर्देशक भट्टराईलाई सरुवा गरिएको थियो ।

राजस्व र सम्पत्तिका डीजी फेरेपछि प्रधानमन्त्री ओलीले राष्ट्रिय अनुसन्धान विभागका प्रमुख थापालाई पनि हटाउन लागेका हुन् । थापालाई २०७९ भदौ २७ गते तत्कालीन शेरबहादुर देउवा नेतृत्वको सरकारले राष्ट्रिय अनुसन्धान विभागको प्रमुखमा नियुक्त गरेको थियो । ३ बर्ष कार्यकाल रहेका थापाको अब १ बर्ष बाँकी छ ।

प्रधानमन्त्री ओली राष्ट्रिय अनुसन्धान विभागमात्र होइन, नेपाल प्रहरीका प्रमुखको कार्यशैलीबाट पनि सन्तुष्ट नभएको बताइन्छ ।