डेढ बर्षसम्म संचालन हुन नसकेको अन्तर्राष्ट्रिय विमानस्थलको अध्ययन गर्न संसदीय उपसमिति पोखरामा

काठमाडौं ।  सार्वजनिक लेखासमितिले गठन गरेको राजेन्द्र लिङ्देन नेतृत्वको उपसमिति  संचालन हुन नसकेको अन्तर्राष्ट्रिय विमानस्थलको अध्ययनको क्रममा पोखरा पुगेको छ ।

२०७९ पुस १७ गते उद्घाटन भएको पोखरा विमानस्थलबाट हालसम्म अन्तर्राष्ट्रिय उडान हुन नसकेको र निर्माणको क्रममा नियमितता भएको उजुरी सार्वजनिक लेखासमितिमा परेको थियो । त्यसपछि समितिले असार १३ गते राजेन्द्र लिङ्देनको अध्यक्षतामा उपसमिति गठन गरेको थियो । समितिले निर्माणका फाइलहरू अध्ययन गर्ने र स्थलगत अध्ययन गर्ने क्रममा पोखरा पुगेको छ ।

समितिले स्थलगत अध्ययनका साथै पोखरामा सरोकारवालाहरुसँग अन्तरक्रिया समेत गर्ने बताइएको छ ।

संसदीय उपसमितिमा संयोजक लिङ्देनसँगै माओवादी केन्द्रका नेता जनार्दन शर्मा, एमाले नेता गोकुलप्रसाद बास्कोटा, नेकपा एकीकृत समाजवादीका प्रेमबहादुर आले, नेपाली कांग्रेसका देवप्रसाद तिमिल्सिना, अर्जुननरसिंह केसी, दीपक गिरी, रुक्मिणी राना बराइली, तारा लामा तामाङ, रामकृष्ण यादव र अमनलाल मोदी रहेका छन् ।