बैशाख ३ पछि पनि लकडाउन लम्बिने !

 

काठमाडौं, २९ चैत ।

सरकारले बैशाख ३ गतेसम्म लकडाउन घोषणा गरेको छ । आज लकडाउनको १९ औं दिन हो । १९ दिनसम्म घरघरमै बसेर कोरोना भाइरस संक्रमण फैलिन नदिन सहयोग गरिरहेका नागरिकमा बैशाख ३ पछि लकडाउन खुल्ला कि नखुल्ला भन्ने कौतुहलता ब्याप्त  छ । तर बैशाख ३ गते लकडाउन खुल्ने संभावना कम देखिएको छ ।

प्रधानमन्त्री केपी शर्मा ओलीले आज सातै प्रदेशका मुख्यमन्त्रीहरुसँग गरेको भिडियो कन्फ्रेन्समा लकडाउन छिट्टै अन्त्य नहुने संकेत गर्नुभएको उच्चस्रोतले बताएको छ । भारतमा कोरोना भाइरसको संक्रमण फैलिरहेकाले सीमामा अझ कडाइ हुने संभावना देखिएको छ । प्रधानमन्त्री ओलीले भावुक कुरा गरेर लापरबाही स्वीकार्य नहुने र सङ्क्रमण फैलिनबाट सबै सचेत हुनु अनिवार्य छ भन्ने कुरामा भिडियो कन्फ्रेन्समा जोड दिनुभएको थियो । भारतमा सङ्क्रमण फैलिने क्रम बढिरहेको देख्दादेख्दै यहाँ लकडाउन खुला गर्ने कुरा हुन सक्दैन । यसमा नरम बनेर लापरबाही नगर्न म आग्रह गर्दछु’ प्रधानमन्त्री ओलीले मुख्यमन्त्रीहरुसँगको भिडियो कन्फ्रेन्समा प्रष्टसँग आफ्नो कुरा राख्नुभएको थियो ।

प्रधानमन्त्री ओलीले चैत २५ मा राष्ट्रका नाममा गर्नुभएको सम्बोधनमा भन्नुभएको थियो–‘आगामी २ साता सायद हाम्रा लागि थप चुनौतिपूर्ण हुन सक्छन् । यो अवधि कोरोनाको लक्षण प्रकट हुने अवधि मात्रै होइन, समुदायमा फैलिने उच्च जोखिमको अवधि पनि हो । प्रधानमन्त्री ओलीले चैत २५ को सम्बोधनमै २ साता लकडाउन लम्बिने संकेत गरेकाले बैशाख दोस्रो सातासम्म जाने संभावना छ ।