राहत बितरणमा भ्रष्टाचार गर्ने मेयरको कोल्डस्टोरमा छापाः ३ सय ८० बोरा कुहिएको दाल बरामद

 

बारा, २९ चैत ।

कलैया उपमहानगरपालिकाका मेयर राजेश राय यादवले राहतमा कुहिएको दाल र चामल बितरण गरेको समाचार नेपालफेस डटकमले शुक्रबार सप्रमाण सार्वजनिक गरेको थियो । आज बारा जिल्ला प्रशासन र प्रहरीको संयुक्त टोलीले मेयर यादवको यादव कोल्डस्टोरमा छापा मार्दा कुहिएको दाल फेला पारेको छ । यादवले कलैया ७ रंगपुरमा रहेको आफ्नै यादव कोल्डस्टोरमा ४ बर्षअघि राखेको रहरको दाल उपमहानगरका सबै वडामा राहतका रुपमा बितरण गर्न लगाएका थिए । उपमहानगरपालिकाबाट प्रतिकिलो १ सय २० रुपैयाँमा खरिद गर्नेगरी उक्त दाल हरेक वडामा बितरण गरिएको थियो ।

त्यसैगरी मेयरले उद्योग बाणिज्य संघसँग समन्वय नै नगरी प्रतिकेजी ४१ रुपैयाँ ५० पैसामा चामल किनेर बितरण गरेका थिए । जबकि बारा उद्योग बाणिज्य संघले प्रतिकिलो ४० रुपैयाँ चामलको मूल्य तोकेको थियो । मेयरले बितरण गरेको चामलसमेत गुणस्तरहीन पाइएपछि राहत लिनेहरुले फिर्ता गर्न सुरु गरेका थिए । एक महिनाअघि कोल्डास्टोरले २० रुपैयाँका दरले खरिद गरेको आलु पनि मेयर यादवले ४० रुपैयाँ प्रतिकिलो भुक्तानी गर्नेगरी राहतमा बितरण गरेका थिए । मेयरले नै कालोबजारीमा आफ्नो कोल्डस्टोरको कुहिएको दाल र आलु कालोबजारीमा बिक्री गरी करोडौं भ्रष्टाचार गरेको समाचार नेपालफेसले सार्वजनिक गरेको थियो । मेयर यादवको घर रहेको कलैया ७ वडाका राहत पाउनेले नै सडेको दाल र चामल भन्दै फिर्ता गर्न सुरु गरेका थिए । २२ नम्बर वडाबासीले पनि सडकमा नै सडेको दाल र चामल प्रदर्शन गरी उपहानगरलाई फिर्ता गरेको भिडियो समेत सार्वजनिक भएको थियो ।

कलैया उपमहानगरपालिकाले बितरण गरेको राहतको गुणस्तरहीन चामल र दाल । 

आज प्रशासनले छापा मारी ३ सय ८० बोरा रहरको कुहिएको दाल बरामद गरेपछि मेयरले कोरोना महामारीको बहानामा राहतमा घोटाला गरी कमाउन खोेजेको पुष्टी भएको छ । मेयर यादव कालोबजारी र गुणस्तरहीन खाद्यान्न बितरण गरी उपमहानगरबासीबीच बदनाम भएका छन् ।

संविधानसभा सदस्य प्रमोद गुप्ताले सामाजिक संजालमै कलैया उपमहानगरपालिकाले राहतमा बाँडेको कुहिएको दालको फोटो नै पोष्ट गरेका थिए । लकडाउनका बेला नागरिक भोकै नपरुन् भनेर सरकारले स्थानीय निकायलाई जिल्ला प्रशासन कार्यालय, उवासंघ जस्ता निकायसँग समन्वय गरी राहत बितरण गर्न निर्देशन दिएको थियो । तर कलैयाका मेयर यादवले त्यसविपरीत आफ्नै हात जगन्नाथ जस्तो आफ्नै कोल्डस्टोरबाट कुहिएको दाल बितरण गरे भने कालोबजारीमा आलु दोब्बर मूल्य लिएर राहत बाँडेको बिषयमा नेपालफेसले समाचार सार्वजनिक गरेको थियो । कुहिएको दाल बितरण गरिएको पुष्टी भइसकेको छ भने चामलको बारेमा पनि छानबिन गर्न प्रशासनमाथि दबाब परेको छ । आलुको कालोबजारीका बारेमा पनि छानबिन गर्नुपर्ने आवाज उठेको छ । 

यो पनि पढ्नुहोस्ः

महामारीमा मेयरको कमाउधन्दाः सडेको दाल र आलुको मूल्य दोब्बर