बालेनको चेतावनीलगत्तै महानगरका ४ सवारी चालक रिहा

काठमाडौं । काठमाडौं महानगरपालिकाको फोहोर बोक्ने गाडीका चालक छुटेका छन् । प्रहरीले सोमबार महानगरका फोहोर बोक्ने गाडीा ४ सवारीचालकलाई पक्राउ गरेलगत्तै मेयर बालेन साहले सामाजिक सञ्जालमा आक्रोश पोखेका थिए । उनको आक्रोशलगत्तै प्रहरीले नियन्त्रणमा लिइएका चालकहरूलाई रिहा गरेको छ ।

चालक रिहा भएपछि मेयर बालेन साहले सामाजिक संजालमा लेखेका छन्–‘जो कोहीले यति बुझ्नुहोला– पदमा तलमाथि होला, भूमिकामा तलमाथि होला । तर नियम, कानुन र भूमिकामा बस्ने हरेक कर्मचारीको, हरेक महानगरबासीको आत्मसम्मान हुन्छ ।

त्यसमा कसैले सम्झौता गर्न पाइँदैन । काठमाडौं महानगर यसमा संवेदनशील छ’ उनले भनेका छन्–‘अझ आफ्नो कर्तव्य निभाइरहेका आफ्ना कुनै कर्मचारी अनाहकमा अपमान महानगरले सहँदैन । बुझेर कदम चाल्नुहोला’, उल्लेख गरेका छन् ।

यसअघि उनले फेसबुकबाटै चालकलाई रिहा नगरेसम्म सिंहदरबारको, पार्टीहरूका कार्यालयको र नेताहरूको घरबाट फोहोर नउठाउने चेतावनी दिएका थिए ।