नागरिक उन्मुक्ति पार्टीमा गाईजात्रा, हिजो समर्थन फिर्ता, आज मन्त्रालयको जिम्मेवारी

धनगढी । नागरिक उन्मुक्ति पार्टी (नाउपा) मा गाईजात्रा देखिएको छ ।

बुधबार उक्त पार्टीले सुदूरपश्चिम सरकारबाट समर्थन फिर्ता लियो । बिहीबार (आज) सुदूरपश्चिमका दुई बिना विभागीय मन्त्रीहरूले कार्यभार पाएका छन् । मुख्यमन्त्री कमलबहादुर शाहले समर्थन फिर्ता लिएको भोलिपल्टै उनीहरुलाई विभाग दिनुले कतै बुधबारको निर्णय घुर्की मात्र त थिएन भन्ने अनुमान गरिएको छ ।

रंजिता चौधरीले रेशम चौधरी विदेश गएको मौका पारी पार्टीको बैठक बोलाएर सुदूरपश्चिम सरकारलाई दिएको समर्थन फिर्ता लिएकी थिइन् ।

सुदूरपश्चिम सरकारका मुख्यमन्त्री कमलबहादुर शाहले नाउपाका दुई मन्त्री लक्ष्मण किशोर चौधरी र खुसीराम डगौरा थारूलाई मन्त्रालयको जिम्मेवारी दिएका हुन् ।

मुख्यमन्त्री शाहले लक्ष्मण किशोर चौधरीलाई सामाजिक विकास तथा खुसीरामले उद्योग पर्यटन वन तथा वातावरण मन्त्रालयको जिम्मेवारी दिएका छन् । उनीहरुले आजै पदभार ग्रहण गर्दैछन् ।