टेरामक्स घोटालाबाट उम्किन बिचौलियाको प्रयोग गरेका अर्याल भौचर काण्डमा परे

काठमाडौं । टेरामक्स खरिद प्रक्रियामा भएको अनियमितताको अनुसन्धान गरिरहेको अख्तियार दुरुपयोग अनुसन्धान आयोगले छिट्टै विशेष अदालतमा मुद्दा दर्ता गर्ने अभिब्यक्ति प्रमुख आयुक्त प्रेमकुमार राईले दिइसकेका छन् । टेरामक्स खरिद अनियमिततामा प्रत्यक्ष मुछिएका मुख्यसचिव बैकुन्ठ अर्याल भने भ्रष्टाचारमा मुद्दा चल्न नदिनका लागि बिभिन्न बिचौलिया प्रयोग गर्दैआएका थिए । बालुवाटारदेखि अख्तियारका पदाधिकारीसँगको पहुँच देखाउँदै टेलिकमका ठेक्कामा कब्जा जमाएका राम थापालाई उनले प्रयोग गर्दैआएका थिए ।

टेरामक्समा मुद्दा नचलाउने वातावरण बनाउन बिचौलिया प्रयोग गर्दैआएका अर्याल अख्तियारको थुनामा रहेका सुरक्षण मुद्रण विकास समितिका पूर्वकार्यकारी निर्देशक विकल पौडेलसँग घुस लिएको काण्डमा परेका छन् । जुन काण्डमा उनले रकम लिएको भौचरसमेत कान्तिपुरले सार्वजनिक गरेको छ ।

टेलिकमका धेरै ठेक्का सेटिङमा कब्जा गर्दैआएका राम थापा नामका बिचौलियालाई उनले अख्तियार मिलाउनका लागि परिचालन गरेका थिए । स्रोतका अनुसार राम थापाले अख्तियार प्रमुख प्रेमकुमार राईसँग आफ्नो सम्बन्ध रहेको भन्दै टेरामक्समा जोगाइदिने आश्वासन दिएका थिए ।

अख्तियारमा पहुँच देखाएर प्रमुख आयुक्त राईको बदनाम गर्दै आएका थापा टेलिकमको बिलिङको ठेक्का लिनका लागि मुख्यसचिवमार्फत् पनि प्रबन्ध निर्देशक संगीता पहाडीलाई दबाब दिइरहेका छन् । उनका श्रीमान सेनाका प्राविधिक कर्णेल विश्वबन्धु पहाडीसँग थापाको दैनिकजसो उठबस हुने गरेको छ । एमडी संगीता पहाडीका श्रीमानले नै टेलिकमका ठेक्कामा सेटिङ गर्दैआएका छन् ।

बिचौलिया थापाले आफन्तको नाममा कम्पनी खोलेर अख्तियारमा पहुँच देखाएर टेलिकमका ठेक्का लिने गरेका छन् । पछिल्ला दिनमा राम थापा टिकटक खुलाउन प्रधानमन्त्री पुष्पकमल दाहाल ‘प्रचण्ड’सम्म पुगिसकेका छन् । बालुवाटारकी शक्तिशाली महिला गंगा दाहालमार्फत् उनी टिकटक खुलाउने दाउमा छन । दूर संचार प्राधिकरणले भित्रभित्रै चलाएको भन्दै इन्टरप्रदायक संस्थाहरुलाई कारबाही गर्ने सूचना जारी गरिरहेको बेला थापा भने बालुवाटारमार्फत् खुलाउन हिंडेका हुन् । थापाको माओवादी नेता जनार्दन शर्मासँग पनि हिमचिम रहेको बताइन्छ ।