बालकुमारी घटनामा आफू र आफ्नो मन्त्रालयको कुनै संलग्नता नरहेको मन्त्री ज्वालाको दाबी

काठमाडौँ । ललितपुरको बालकुमारी घटनामा भौतिक पूर्वाधार तथा यातायात मन्त्री प्रकाश ज्वालाले आफू र आफ्नो मन्त्रालयको कुनै सरोकार र संलग्नता नरहेको दाबी गरेका छन् । ईपीएस परीक्षामा सहभागी हुन नपाएका युवाहरुले आज मन्त्री ज्वालाको गाडी रोकेर आगो लगाएका थिए ।

त्यसपछि प्रहरीले त्यहाँको माहोल शान्त बनाउन चलाएको गोली लागेर दुई जनाको मृत्यु भएको थियो । एकीकृत समाजवादीको केन्द्रीय समिति बैठकपछि सञ्चारकर्मीसँग कुरा गर्दै मन्त्री ज्वालाले घटनाप्रति दुःख व्यक्त गर्दै नहुनुपर्ने घटना भएको बताए ।

‘यो घटनामा मेरो र मेरो मन्त्रालयको कुनै सरोकार र सम्बन्ध छैन’, मन्त्री ज्वालाले भने, ‘बालकुमारी क्षेत्रमा जुन घटना भयो र हाम्रो गाडीमा समेत आगजनी भयो यसमा दुख व्यक्त गर्छु ।’ उनले मानिसको ज्यान जाने र घाइते हुने कुरा अत्यन्त दुःखद रहेको भन्दै घटनाका सम्बन्धमा आफ्नो मन्त्रालयको कुनै साइनो र सम्बन्ध नरहेको बताए ।

‘ गुडिरहेको गाडी रोकियो, हावा खुस्काइयो र जलाइयो । विना कारण, विना सम्बन्ध । जो र जसको सरोकार थियो त्यो एउटा विषय होला हाम्रो गाडीमा आगजनी गर्नुपर्ने कारण थिएन, सरकारी सम्पत्तिमा क्षति पुर्‍याउने कुरा खेदजनक छ’, मन्त्री ज्वालाले भने।