बाराका प्रिन्सिपल स्वर्णकारको हत्याका मुख्य आरोपी सुटर पक्राउ

काठमाडौं । बाराको कलैयास्थित बाल एकता बोर्डिङ स्कुलका प्रिन्सिपल रूपेश स्वर्णकारको हत्याका मुख्य आरोपी सुटर सुजित सिंह पक्राउ परेका छन् । बाराको विश्रामपुर गाउँपालिका-३ बाट गएराति ३२ वर्षीय सुजित सिंहलाई प्रहरीले गोली हानेर पक्राउ गरेको हाे ।

खुट्टामा गोली लागेपछि दौडन नसकेपछि प्रहरीले उनलाई नियन्त्रणमा लिएको  हो । दुवै खुट्टामा प्रहरीको गोली लागेर घाइते भएका सिंहको उपचार रातिदेखि नै प्रादेशिक अस्पताल कलैयामा भइरहेको छ । उनी भारतको बिहार राज्यमा पर्ने मोतीहारी जिल्लाको हुन् ।

गत कार्तिक १३ मा दुई मोटरसाइकलमा रहेका चार जनाले गोली चलाउँदा प्रिन्सिपल स्वर्णकार घाइते भएका थिए । उनलाई उपचारका लागि वीरगञ्ज लगे लगत्तै उनको मृत्यु भएको थियो ।