३२ करोड हिनामिना गरेको आरोपमा कञ्चनपुरमा चार जना पक्राउ

काठमाडौं । शिव शिखर बहुउद्देश्यीय सहकारीमा कार्यरत चार जना कर्मचारीलाई ठगी गरेको आरोपमा प्रहरीले पक्राउ गरेको छ । महेन्द्रनगर, त्रिभुवन बस्ती र बेलौरीका ३ हजार ६ सय ७१ बचतकर्ताहरूले आफूले जम्मा गरेको रकम सहकारीका कर्मचारीले हिनामिना गरेको भन्दै प्रहरीमा मुद्दा दिएपछि उनीहरूलाई पक्राउ गरिएकाे हाे ।

पक्राउ पर्नेमा सहकारीमा कार्यरत गीता शर्मा, केदारनाथ शर्मा, पुष्कर मल्ल र अमिसराज भण्डारी रहेका छन् ।

जम्मा गरेको बचत रकम फिर्ता माग्दा फिर्ता नपाएपछि बचतकर्ताले प्रहरीमा सहकारी विरुद्ध उजुरी दर्ता गरेका थिए ।

उक्त सहकारीका सञ्चालक समितिका पदाधिकारी तथा कर्मचारीहरूले बचतकर्ताको ३१ करोड ९७ लाख तीन हजार ९ सय रुपैयाँ हिनामिना गरेको बचतकर्ताको आरोप छ ।