झापामा सवारी दुर्घटना, एकको मृत्यु, तीन घाइते

विर्तामोड। झापाको गौरादहको कार्की चोकमा आज बिहान सिटीसफारी र मिनी ट्रक दुर्घटना हुँदा एक जनाको ज्यान गएको छ।

गौरादह डिपु चोकबाट गौरादह ३ बरगाछीतर्फ जाँदै गरेको गौरादह नगरपालिकाको ई ५३ नम्बरको सिटी सफारीलाई पानी कम्पनी बेलाको ना.अ.प.स. २५३ नम्बरको पिकअप गाडीले पछाडिबाट ठक्कर दिँदा दुबै सवारी पल्टिएका थिए।

उक्त दुर्घटनामा सिटी चालक गौरादह २ का अन्दाजी ५० वर्षीय रघुनाथ काफ्लेको मृत्यु भएको हो। अन्य तीन जना घाइते रहेको प्रहरीले जनाएको छ।

दुर्घटनामा परी सिटीमा सवार गौरादह ३ बस्ने ५५ वर्षीया रमा नेपाल र सोही ठाउँकी ४४ वर्षीया मेनुका भण्डारी घाइते भएका छन्।

त्यस्तै पिकअप चालक गौरीगञ्ज बस्ने राजेश दास पनि घाइते भएका छन् । घाइतेहरुको दमकमा उपचार भइरहेको दमक प्रहरीले बताएको छ।