धनुषामा सशस्त्र प्रहरी बल नेपालको सक्रियता, १२ लाख मूल्य बराबरका अबैध सामान बरामद

धनुषा । अबैध चोरी निकासी नियन्त्रणमा खटिइरहेको सशस्त्र प्रहरी बल नेपालले धनुषा जिल्लाको जनकनन्दिनी गाउँपालिका वडा नं. १ इनर्वास्थित अड्डा टोल इलाकाबाट भारी मात्रामा कपडा बरामद गरेको छ ।

धनुषा जिल्लास्थित सशस्त्र प्रहरी बल नेपाल नं. ८ गण धनुषाका गणपति सशस्त्र प्रहरी उपरीक्षक दिनेश मल्लको सक्रियतामा सशस्त्र प्रहरी बल नेपाल प्रस्तावित सीमा सुरक्षा गुल्म महिनाथपुर मातहत बिओपी ईनर्वाबाट विशेष सूचनाका आधारमा खटिएको टोलीले कार्तिक २० गते राति ११ बजेको समयमा भारतबाट भन्सार छली तीन वटा मोटरसाइकलमा राखी नेपालतर्फ ल्याउँदै गरेको अन्दाजी ३ लाख ७५ हजार मूल्य बराबरको कपडा र कपडा ल्याउन प्रयोग गरेको अन्दाजी ४ लाख ५० हजार मूल्य बराबरको मोटरसाइकल समेत बरामद गरेको हो ।

साथै सोही रात सशस्त्र प्रहरी बल नेपाल नं. ८ गणबाट खटिएको टोलीले जनकपुरस्थित महाविर चोकबाट २ वटा मोटरसाईकलमा अबैध रुपमा ल्याउँदै गरेको अन्दाजी २ लाख मूल्य बराबरको कपडा र कपडा ल्याउन प्रयोग गरेको अन्दाजी २ लाख मूल्य बराबरको मोटरसाइकल समेत बरामद गरेको छ ।

सशस्त्र प्रहरीको गस्ती टोलीलाई देखे पश्चात् तस्करहरु मोटरसाइकल र सामान छाडी भागेका थिए । उक्त कपडा र मोटरसाइकल गरी जम्मा १२ लाख २५ हजार बराबरको बरामद सामान आवश्यक कारबाहीको लागि जनकपुर भन्सार कार्यालयमा बुझाउने प्रक्रियामा रहेको सशस्त्र प्रहरी स्रोतले जनाएको छ ।

सशस्त्र प्रहरी बल नेपाल नं ८ गण धनुषा तथा गण मातहत कार्यालयहरुले चालु आर्थिक वर्षको कार्तिक महिनामा मात्रै ६० लाख भन्दा बढी मूल्य बराबरका अबैध सामान तथा सामान ओसार पसारमा प्रयोग गरिएका सवारी साधनहरु बरामद गरी आवश्यक कारवाहीका लागि जनकपुर भन्सार कार्यालयमा बुझाएका छन् ।