अवैध काठसहित दुई युवक प्रहरी नियन्त्रणमा

काठमाडौं। झापा जिल्लाको बुद्धशान्ति गाउँपालिका-६ शान्तिनगर स्थित ज्यामिरे सामुदायिक वनबाट काठ चोरी निकासी गरेको आरोपमा प्रहरीले ट्र्याक्टरसहित दुई जनालाई नियन्त्रणमा लिएको छ ।

इलाका प्रहरी कार्यालय बुधबारे झापाबाट खटिएको प्रहरी टोलीले मे.१ त.६५३८ न।को ट्र्याक्टरमा सखुवा जातको गोलिया काठ १६ थान ५८.२२ क्यु फिट लोड भएको अवस्थामा फेला परेकोले नियन्त्रणमा लिएको हो ।

पक्राउ पर्नेमा ट्र्याक्टर चालक जिल्ला झापा बुद्धशान्ति गाउँपालिका–४ बस्ने २४ वर्षीय सविन विश्वकर्मा र सोही ट्र्याक्टरमा सवार ३६ वर्षीय धनाहाङ लिम्बू रहेका छन् । उनीहरुलाई आवश्यक कारबाहीका लागि डिभिजन वन कार्यालय भद्रपुर झापामा बुझाइएको प्रहरीले बताएको छ ।