यो साता सेयर बजार २३ अङ्कले घटेर २०६६ को विन्दुमा झर्‍यो

 

काठमाडौँ । सेयर बजार परिसूचक नेप्से यो साता २३.७९ अङ्कले घटेर २ हजार ६६.०५ अङ्कको विन्दुमा झरेको छ । लगातार तीन दिन ६९ अङ्कले घटेको नेप्से सूचक अन्तिम दुई दिन ४६ अङ्कले बढेको छ । साताको पाँच दिन नै खुलेको बजारमा कूल १३ अर्ब ३० करोड ६३ लाख ४६ हजार रुपैयाँ बराबरको सेयर कारोबार भएको छ । अघिल्लो साता ३९ अङ्कले घटेको बजारमा ९ अर्ब ४९ करोड ५२ लाख १२ हजार रुपैयाँको सेयर कारोबार भएको नेप्सेले जनायो।

यस साता सबैभन्दा बढी हाइड्रोपावर समूहको ३९ करोड ५५ लाख ८३ हजार १२६ रुपैयाँ बराबरको १३ लाख ८७ हजार ३९२ कित्ता सेयर किनबेच भएको छ । यस्तै, कमर्सियल बैंकहरुको ३३ करोड ३३ लाख ४ हजार १६६ रुपैयाँ बराबरको १० लाख ९० हजार ४०२ कित्ता सेयर किनबेच भएको छ भने, होटल तथा पर्यटन समूहको २८ करोड ८ लाख ५ हजार ९२८ रुपैयाँ बराबरको ५ लाख ११ हजार ५८४ कित्ता सेयर किनबेच भएको छ ।

सबैभन्दा कम यस साता कर्पोरेट डिभेन्चरको जम्मा ७ लाख ९३५ रुपैयाँ बराबरको ८१० इकाई मात्र किनबेच भएको छ ।

मार्केट क्यापिटलाइजेशन १० अर्ब ४५ करोडले घट्यो

नेप्से सूचक २३ अङ्कले घट्दै गर्दा यो साता यता मार्केट क्यापिटलाइजेशन (बजार पुँजीकरण) १० अर्ब ४५ करोड रुपैयाँले घट्न पुगेको छ । अघिल्लो साताको अन्तिम कारोबार दिन बिहीबार मार्केट क्यापिटलाइजेशन ५३ अर्ब २९ करोडले घटेर ३० खर्ब ७१ अर्ब ६४ करोड २० लाख रुपैयाँ कायम भएको थियो । थप यो साता १० अर्ब ४५ करोड १० लाख रुपैयाँले घट्दै ३० खर्ब ६१ अर्ब १९ करोड १० लाख रुपैयाँमा झरेको हो ।