देव गुरुङ भन्छन्- सीता दाहालमा जसरी पनि पदीय जिम्मेवारी लिने इच्छा थिएन्

काठमाडौं। नेकपा (माओवादी केन्द्र) का महासचिव एवं पूर्वमन्त्री देवप्रसाद गुरुङले प्रधानमन्त्री पुष्पकमल दाहाल प्रचण्डलाई सफल बनाउन प्रचण्डकी धर्मपत्नी सीता दाहालको महत्त्वपूर्ण भूमिका रहेको उल्लेख गरेका छन् ।

‘तीसको दशकमा कमरेड प्रचण्डसँगको वैवाहिक जीवनमा जोडिएपछि कमरेड सीता दाहालको पार्टी निर्माण र पार्टी हेडक्वार्टर सञ्चालनमा सकारात्मक भूमिका रह्यो । पञ्चायत र जनयुद्धकाल संकटको समय थियो । पारिवारिक जिम्मेवारी लिने र कम्युनिस्ट आन्दोलनमा जोडिने कन्ट्राडिक्सनका बीचमा पनि उहाँमा कुनै वैचारिक विचलन भएन । कम्युनिस्ट आन्दोलनप्रति सदैव निष्ठाभाव रहिरह्यो । प्रचण्डलाई सफल बनाउन उहाँकी धर्मपत्नी कमरेड सीता दाहालको महत्त्वपूर्ण भूमिका छ,’ उनले भने ।

दाहालको निधनले माओवादी आन्दोलन र नेपाली कम्युनिस्ट आन्दोलनलाई गम्भीर क्षति पुगेको पनि गुरुङले औंल्याए । उनले भने, ‘मान्छेले त्रुटि गर्दै गर्दैन त भन्न सकिन्न । कमीकमजोरीबाट मुक्त कोही पनि हुन्न । सचेत र अनजानवश हुने भन्ने कुरा मात्र हो । तर उहाँले देश र जनता अनि कम्युनिस्ट आन्दोलनलाई क्षति पुग्ने काम गर्नुभयो भन्ने लाग्दैन ।’

सीता दाहालमा जसरी पनि पदीय जिम्मेवारी लिने इच्छा, आकांक्षा नभएको पनि उनको टिप्पणी छ । दाहाल जहिल्यै पार्टी एकताको पक्षमा उभिएको पनि उनले दाबी गरे ।