माओवादी केन्द्रको जारी स्थायी समिति बैठक आज पनि

काठमाडौं । नेकपा (माओवादी केन्द्र) को जारी स्थायी समिति बैठक आज पनि बस्दैछ ।

साउन १६ देखि पार्टी केन्द्रीय कार्यालय पेरिसडाँडामा सुरु भएको स्थायी समिति बैठक आज चौथो दिन हो ।

बैठकमा अध्यक्ष पुष्पकमल दाहाल ‘प्रचण्ड’ ले प्रस्तुत गरेको समसामयिक राजनीतिक प्रस्ताव तथा राजनीतिक विषयमा स्थायी समिति सदस्यहरुले धारणा राख्ने क्रम जारी छ ।

शनिबार १८ जना स्थायी समिति सदस्य, पाँच पदाधिकारी र एक अनुशासन आयोगका पदाधिकारीले आफ्नो धारणा राखेका थिए ।

त्यस्तै आइतबार १९ जना सदस्यले आफ्नो धारणा राखेका थिए ।

आजको बैठकमा महासचिव देवप्रसाद गुरुङ र वरिष्ठ उपाध्यक्ष नारायणकाजी श्रेष्ठले आफ्नो धारणा राख्नेछन् । उनीहरूले धारणा राखेपछि सदस्यहरूले उठाएका विषयमा अध्यक्ष प्रचण्डले जवाफ दिनेछन् । त्यसपछि बैठक समापन गरिने माओवादीले जनाएको छ ।