टोकियो । जापानका नयाँ प्रधानमन्त्री पदमा योशिहिदे सुगा निर्वाचित भएका छन् । बुधबार संसद्मा भएको मतदानमा ३ सय १४ मतसहित उनी प्रधानमन्त्रीमा निर्वाचित भएका हुन् । लिबरल डेमोक्रेटिक पार्टी (एलडीपी) को बहुमत रहेको संसद्को तल्लो सदन, हाउस अफ रिप्रेजेन्टेटिका ४ सय ६५ सदस्यमध्यबाट ३ सय १४ मत प्राप्त गरेको जापानी समाचार एजेन्सी कोयदो न्युजले जनाएको छ ।
स्वास्थ्य समस्याका कारण प्रधानमन्त्री पदबाट राजीनामा दिएका सिन्जो आबेको उत्तराधिकारीका लागि जापानको सत्तारुढ दल एलडीपी सोमबार नयाँ नेताको रुपमा योशिहिदेलाई सुगालाई निर्वाचित गरेको थियो । पार्टी नेतामा उनले ५ सय ३४ मध्येबाट ३ सय ७७ मत प्राप्त गरेका थिए ।
प्रधानमन्त्रीमा निर्वाचित भएसँगै सुगाले कोरोना महामारीका कारण तहस नहस भएको अर्थतन्त्र उकास्न आफ्नो जोड रहने बताएका छन् । सुगाको कार्यकाल सन् २०२१ को सेप्टेम्बरमा सकिने छ ।
