नेपाल एयरलाइन्सले जेठ २९ देखि भैरहवाबाट मलेसिया नियमित उडान गर्ने

काठमाडौं। राष्ट्रिय ध्वजाबाहक नेपाल एयरलाइन्सले जेठ २९ गतेदेखि भैरहवास्थित गौतमबुद्ध अन्तर्राष्ट्रिय विमानस्थलबाट मलेसियामा नियमित उडान सुरु गर्ने भएको छ। एयरलाइन्सका प्रवक्ता रमेश पौडेलले आज विज्ञप्ति जारी गर्दै सो जानकारी दिएका हुन् ।

उडान तालिकाअनुसार काठमाडौं–क्वालालम्पुर–भैरहवा–काठमाडौं सेक्टरमा उडान गर्ने गरी टिकट बुकिङ्ग खुला गरिएको प्रवक्ता पौडेलले बताएका छन् । निगमले मलेसियाबाट प्रवर्द्धनात्मक भाडादर १२ हजार सात सय रुपैयाँ कायम गरेक छ ।

एयरलाइन्सले भैरहवाबाट हाल हप्ताको एक उडानबाट सुरु गर्ने जनाएको छ । पछि बजारको माग तथा निगमको बजार व्यवस्थापन अनुसार अन्य गन्तव्यमा समेत उडान अनुमति लिई उडानको संख्या बढाउँदै लैजाने योजना रहेको निगमको विज्ञप्तिमा उल्लेख छ ।