रास्वपा संसदीय दलको नेतामा रवि लामिछाने चयन

काठमाडौं । राष्ट्रिय स्वतन्त्र पार्टी (रास्वपा) को संसदीय दलको नेतामा रवि लामिछाने चयन भएका छन् । आज बसेको संसदीय दलको बैठकले पार्टी सभापति समेत रहेका लामिछानेलाई दलको नेता चयन गरेको हो ।

त्यसअघि बसेको केन्द्रीय समिति बैठकले लामिछानेलाई दलको नेता बनाउन प्रस्ताव गरेको थियो । सोहीअनुसार नै सर्वसम्मत रुपमा लामिछानेलाई दलको नेता चयन गरिएको हो । यस्तै बैठकले सांसद निशा डाँगीलाई सचेतक बनाएको छ ।

गत मंसिरको निर्वाचनमा २० सिट जितेको रास्वपामा लामिछाने नै संसदीय दलको नेता बनेका थिए । तर, नागरिकता विवादमा सर्वोच्च अदालतले सांसद पद खारेज गरेपछि डीपी अर्याल दलको नेता भए ।

१० वैशाखको उपचुनावमा लामिछाने चितवन क्षेत्र नम्बर २ बाट निर्वाचित भएपछि अर्यालले संसदीय दलको नेताबाट राजीनामा दिएका थिए ।