भारतबाट अन्तिम पटक नेपाल प्रवेश गर्न दिइने

काठमाडौं, १२ चैत । सरकारले दक्षिण सीमाबाट नेपाल आउने नेपालीहरुलाई प्रवेशको अन्तिम अवसर दिने भएको छ । उनीहरुलाई १४ दिनको क्वारेन्टाइनमा अनिवार्य राख्ने गरी आज जम्मा भएका नेपालीहरुलाई नेपाल प्रवेशको अनुमति दिइने अर्थमन्त्री युवाराज खतिवडाले बताए । 

उनीहरुलाई प्रदेश र स्थानीय सरकारको समन्वयमा क्वारेन्टाइनमा राखिने मन्त्री खतिवडाले बताए । स्वास्थ्य सामाग्री ल्याउनको लागि निजी क्षेत्रलाई आह्वान समेत गर्ने र त्यसको सहजीकरण कोरोना भाइरसको सम्भावित संक्रमण रोक्नका लागि बनेको उच्चस्तरीय समन्वय समितिले गर्नेछ ।

बैठकले स्वास्थ्य सामग्री तथा किटहरु ल्याउनको लागि निजी क्षेत्रसँग समन्वयन गर्ने निर्णय भएको समेत गरेको छ । सरकारले मेडिकल सामग्री र किटहरु चीन र भारत दुवै मुलुकबाट ल्याउन परराष्ट्र मन्त्रालयले परामर्श गरिरहेको मन्त्री खतिवडाले बताए । त्यसबाहेक निजी क्षेत्रले कतैबाट स्वास्थ्य सामग्री र किटहरु निश्चित दिनभित्र ल्याउन सक्ने भए सरकारले यातायातको सुविधा एवं हवाई सुविधा उपलब्ध गराउने निर्णय भएको समेत बताए ।

कोरोना संक्रमणको लक्षण देखिएमा धुलिखेल अस्पताल, बीपी कोइराला स्वास्थ्य विज्ञान प्रतिस्ठान धरान, वीर अस्पतालमा तत्कालै यन्त्र उपकरण जडान गर्ने र प्रदेशस्तरमै ल्याबहरु स्थापना नहुँदासम्म छिटो यातायातको व्यवस्था गरेर टेकु स्थित ल्याबमा स्वाब परीक्षणका लागि ल्याउने व्यवस्था गर्ने निर्णय बैठकले गरेको छ ।
बैठकले सरकारले जारी गरेको लक डाउनका लागि नागरिकस्तरबाट पालना भएको र छिटफुट रुपमा अवज्ञा भएपनि थप कडाइ गर्ने अवस्था नभएको बताए ।

निजीका संस्थाले कोरोना कोष बनाएको भए आफु मातहतका कर्मचारीको जम्मा गरेर एक सातामा सरकारलाई हस्तान्तरण गर्न समितिले भनेको छ । नागरिक दैनिकबाट