जवाफी ब्याटिङमा नेपालको खराब सुरुवात २ ओभरमा २ विकेट गुम्यो

काठमाडौँ। आईसीसी क्रिकेट लिग- २ श्रृंखलाको अन्तिम खेलमा जवाफी ब्याटिङमा मैदानमा उत्रिएको नेपालले खराब सुरुआत गरेको छ। उक्त खेलमा पाहुना टोली यूएईले दिएको ३ सय ११ रनको लक्ष्य पछ्याउनेक्रममा नेपालले सस्तैमा दुई विकेट समेत गुमाएको छ । नेपालले पहिलो विकेटको रूपमा आसिफ शेखलाई शून्यमै गुमायो ।

दोस्रो विकेटको रूपमा कुशल मल्ल ५ रनमा आउट भए । आसिफलाई आयान अफजल खान र जुनैद सिद्दिकीले आउट गरेका हुन् ।

त्यसअघि कीर्तिपुरस्थित त्रिवि मैदानमा टस जितेर ब्याटिङ रोजेको यूएईले निर्धारित ५० ओभरमा ६ विकेट गुमाएर ३ सय १० रन बनायो । उसका लागि आसिफ खानले कीर्तिमानी शतक बनाए । उनले ४२ बलमा ११ छक्का र चार चौकासहित अविजित १०१ रन बनाए ।

आसिफले ४१ बलमै शतक बनाए । योसँगै आसिफ ओडिआईमा सर्वाधिक कम बलमा शतक बनाउने एसोसिएट ब्याटर बने । त्यस्तै, वृत्य अरविन्दले १३८ बलमा ८ चौका र २ छक्कासहित ९४ रनको पारी खेले ।

कप्तान मोहम्मद वसिमले ४९ बलमा ६ छक्का र दुई चौकासहित ६३ रन बनाए । रोहन मुस्तफा २०, सिपी रिजवान सात, आर्यन लाक्रा ६ र आयान अफजल खानले तीन रनमा आउट भए । आजको खेलमा नेपाली बलर महँगा साबित भए ।

यसैक्रममा टोलीका स्टार स्पिनर सन्दीप लामिछानेले १० ओभरमा एक विकेट लिएर ८० रन दिए । त्यस्तै, सोमपाल कामीले ९ ओभरमाा एक मेडनसहित ७१ रन दिएर एक विकेट मात्र लिन सके । गुलशन झाले ८ ओभरमा बिनाविकेट ६३ रन खर्चिए ।

दीपेन्द्र सिंह ऐरी र ललित राजवंशीले भने किफायती बलिङ गरे । ऐरीले ८ ओाभरमा २ मेडनसहित १९ रन दिएर महत्वपूर्ण २ विकेट लिए र ललितले १० ओभरमा २७ रन मात्र खर्चिएर महत्वपूर्ण एक विकेट लिए । कुशल मल्लले भने ४ ओभरमा बिनाविकेट ३८ रन खर्चिए ।