प्रदेश १ : मुख्यमन्त्रीले सदभाव भड्काउन खोजेको एमाले सांसदको आरोप

काठमाडौं । प्रदेश १ को नामाकरणको बहस चलिरहँदा मुख्यमन्त्री राजेन्द्रकुमार राईले केही दिनअघि दिएको अभिव्यक्तिप्रति नेकपा एमालेका सांसदहरूले प्रदेश सभामै आपत्ति जनाएका छन् । उनीहरूले मुख्यमन्त्री राईको अभिव्यक्ति मान्छे उचाल्ने र सामाजिक सद्‌भाव भड्काउने खालको भएको भन्दै विरोध जनाएका हुन् ।

प्रदेश सभाको शून्य समयमा एमाले सांसद बिनादेवी राईले विपक्षमा रहँदा नामाकरण छिटो गर्नु पर्‍याे भन्‍ने दलहरू नै अहिले नामाकरणका विषयमा मौन रहेको बताइन् । मुख्यमन्त्रीले जनतालाई उचाल्ने काम गरेको र हिंसा भड्काउन खोजेको आरोप उनले लगाइन् । ‘मुख्यमन्त्री जनता समक्ष गएर जनतालाई उचाल्ने काम गरिरहेका छन्, म जसरी पनि किराँत बनाउँछु, छिट्टै म नामाकरण गर्छु भनिराख्नु भएको छ,’ उनले प्रश्न गरिन्, ‘आज जनता सडकमा आन्दोलित छन् तर सरकारको मुख्यमन्त्रीले नामाकरणको विषय किन टेबुल नगरेको ? सरकार आफैं हिंसा भड्काउने उद्वेलित छ सभामुखज्यू ।’

नले जनताहरूको भावना अनुसार तत्काल प्रदेश १ को नामाकरण गर्न समेत माग गरिन् ।

पूर्वराज्यमन्त्री तथा एमालेका सांसद लिलाबल्लभ अधिकारीले मुख्यमन्त्रीको केही समयदेखि यता आएको अभिव्यक्तिले मुलुककै ध्यान खिचेको बताए । उनले मुख्यमन्त्री राईले कुनै पहिचान विशेषको मुद्दाको सम्बोधन भएको वा नभएको कारणबाट मुलुक उथलपुथल हुन्छ भन्‍न नमिल्ने जिकिर गरे ।

‘मुद्दाको सम्बोधन भएको वा नभएको कारणबाट मुलुकको उथलपुथल हुन्छ भन्‍न मिल्छ कि मिल्दैन ? विद्रोह हुन्छ भन्‍न मिल्छ कि मिल्दैन ? सामाजिक जातीय सद्‌भाव भड्किने गरी अरु पहिचानवालालाई असर पर्ने गरी जिम्मेवार व्यक्तिले अभिव्यक्ति दिन हुन्छ कि हुँदैन ?,’ उनले भने, ‘म मुख्यमन्त्रीको ध्यानाकर्षण गराउन चाहन्छु, यसको जवाफ दिनुपर्छ, मान्छेको आफ्नो पोजिसनको हैसियत हुन्छ, त्यसको मर्यादाको कामय गर्नुपर्छ कि पर्दैन ?’

प्रदेश १ का मुख्यमन्त्री राईले मुख्यमन्त्री कार्यालयमै ज्ञापनपत्र बुझाउन गएका किराँत राई यायोख्खाको नेतृत्व समक्ष साउन २ गते भड्काउपूर्ण अभिव्यक्ति दिएका थिए । उनले यायोख्खाका प्रतिनिधिहरूलाई सडकमा उत्रिन जरूरी हुने बताएका थिए । मुख्यमन्त्री राईले पहिचानविनाको नामाकरण भए प्रदेशवासीहरूमा राज्यप्रति अलगावको स्थिति पैदा हुने, नागरिकहरू विदेशिने, कर नतिर्ने र राज्यलाई नै नटेर्ने अवस्था सिर्जना हुने र मुलुक नै विखण्डनसम्म हुनसक्ने तर्क गरेका थिए ।

सरकारले नामाकरण गर्ने भए उहिले नै किराँत प्रदेश राख्‍ने निर्णय गरिसक्ने उनले बताएका थिए ।

मुख्यमन्त्री राईले आफू नामको पक्षमा भित्री दिलदेखि नै किराँतको पक्षमा रहेको ज्ञापनपत्र बुझाउन पुगेका यायोख्खाका प्रतिनिधिहरूलाई भनेका थिए । उनले सत्ता साझेदार मुख्य दल नेपाली कांग्रेस र प्रमुख प्रतिपक्षी दल नेकपा एमालेले पनि पहिचानलाई स्वीकार गर्ने बताएका थिए ।

आफ्नो अभिव्यक्ति विवादित बनेपछि त्यसपछिका कार्यक्रमहरूमा भने मुख्यमन्त्री राईले आफ्नो भनाईलाई गलत अर्थ लगाइएको बताउँदै आएका छन् ।