काठमाडौंबाट फोहोर लिएर गएका  ट्रक स्थानीयको अवरोधपछि सिसडोलमै रोकिए

काठमाडौं । काठमाडौंबाट  फोहोर लिएर गएका  ट्रकलाई  धादिङको बन्चरेडाँडाका स्थानीयले आज पनि  अवरोध गरेका छन् ।

आज  फोहोर लिएर विसर्जनस्थलतर्फ गएका ट्रकलाई अवरोध गरिएको स्थानीय श्रीराम ढुंगानाले जानकारी दिए । उनले मंगलबारदेखिकै आन्दोलन आजसम्म पनि नरोकिएको बताए ।
अवरोधपछि फोहोर बोकेका गाडी नुवाकोटको सिसडोल क्षेत्रमा रोकिएका छन् । मंगलबार पनि स्थानीयले अवरोध गरेका थिए ।

त्यसपछि प्रहरीको सुरक्षा घेरामा करिब १५० गाडीले बन्चरेडाँडामा फोहोर खसालेका थिए ।
सोमबार काठमाडौंमा बन्चरेडाँडामा फोहोर फाल्नेसम्बन्धी त्रिपक्षीय सम्झौता भएको थियो । उक्त सम्झौताले आफूहरूका माग पूरा नगरेको भन्दै स्थानीय आन्दोलित छन् ।