कांग्रेसको दोस्रो पंक्तिका नेताहरुकाे उत्ताउलो कुराले पार्टी घाटामा जानसक्छ: तुलाधर

काठमाडौं । नेकपा एकीकृत समाजवादीका उपमहासचिव गंगालाल तुलाधरले नेपाली कांग्रेसको दोस्रो पंक्तिका नेताहरुकाे उत्ताउलो कुराले पार्टी घाटामा जानसक्ने बताएका छन् । 

बिहीबार पार्टीको केन्द्रीय समितिको बैठकमा उनले कांग्रेसको शीर्ष नेतृत्व गठबन्धनप्रति सकारात्मक भए पनि दोस्रो पंक्तिका नेताहरुले गठबन्धन गर्नुहुन्न भनेर उत्ताउलो कुरा गर्नाले पार्टी घाटामा जानसक्ने बताएका हुन् ।

लोकप्रियताका लागि मात्र ३० वैशाखमा हुने स्थानीय तह निर्वाचनमा गठबन्धन नगरे कांग्रेसलाई नै घाटा हुने उनले दावी गरे ।

‘गठबन्धनमा आवद्ध दलमध्ये कांग्रेस प्रमुख दल हो । कांग्रेसको इच्छा भएन भने कांग्रेसबाहेकका दलको गठबन्धन बन्न सक्छ त्यो कुरा संस्थागत रुपमा कांग्रेसका लागि घाटा हुन सक्छ’ उपमहासचिव तुलाधरले भने ।

‘गठबन्धन हाम्रो मात्र कारणले बनेको होइन । गठबन्धनको आवश्यकता हामीलाई मात्र होइन, पाँचै दललाई छ’ बैठकमा नेताहरुको भनाइ उधृत गर्दै उनले सञ्चारकर्मीहरुसँग भने, ‘हामीले अन्तिमसम्म प्रयत्न गनुपर्छ स्थानीय मात्र होइन प्रदेश र संघको चुनावमा गठबन्धन बनाउन हदैसम्म लचकता अपनाएर कोशिस गर्नुपर्छ ।’