१५५ आइसोलेटेड शय्या तयार, २३५ आईसीयू थपिने

काठमाडौं, ३ चैत । सरकारले कोभिड–१९ का संक्रमितको उपचार गर्न हाल १ सय ५५ वटा आइसोलेटेड बेड तयार गरेको छ । त्यसका साथै २ सय ३५ वटा आईसीयू थप्ने तयारी थालेको छ । 

स्वास्थ्य तथा जनसंख्यामन्त्री भानुभक्त ढकालले आइतबार राष्ट्रिय सभामा काठमाडौं उपत्यकाका तीनवटा अस्पतालमा आइसोलेटेड बेडसहित कोभिड–१९ संक्रमितको उपचार गर्ने व्यवस्था मिलाइएको जानकारी दिएका हुन् । ‘संक्रमण देखिइहाल्यो भने ३ वटा अस्पतालमा केन्द्रित रहेर उपचार हुनेछ’ उनले भने, ‘उपत्यकामा १ सय २० वटा र उपत्यका बाहिर १ सय १५ वटा गरी थप २ सय ३५ वटा आईसीयू बन्दैछन् ।’ उनले औषधि र औजारहरू जोहो गर्न पनि थालिसकेको बताए ।

बैठकमा सांसदहरूले औषधि र खाद्यान्नको अवस्था, कालोबजारी नियन्त्रणको पहल, विद्यार्थीको पढाइ, सेल्फ क्वारेन्टाइन, तीनै तहका सरकारको समन्वयलगायत विषयमा प्रश्न गरेका थिए ।

मन्त्री ढकालले नेपालमा एक जनामा संक्रमण देखिएको र उनी पनि निको भइसकेको जानकारी दिए । ‘हामी संक्रमण नेपालमा छिर्नै नदिने गरी तयारीमा लागेका छौं र संक्रमण भइहाले उपचारमा कमी हुन दिने छैनौं,’ उनले भने । उनले कोभिड–१९ संक्रमण देखिए उपचारको जिम्मा राज्यले लिने बताए । उनका अनुसार मुख्य सचिव नेतृत्वको प्राविधिक समितिको बैठक प्रत्येक दिन ४ बजे बस्ने गरेको छ । सरकारले नेपाल र विदेशको जानकारी दिन दिनैपिच्छे स्वास्थ्य बुलेटिन पनि निकाल्ने गरेको जानकारी पनि उनले दिए ।

मन्त्री ढकालले विदेशबाट अत्यावश्यक रूपमा नेपाल आउनुपरे नेपालीले पनि ७ दिनको खकार जाँचको रिपोर्ट पेस गर्नुपर्ने बताए । ‘स्वस्थ प्रमाणित भए प्रवेश गराइने छ भने क्वारेन्टाइनमा १४ दिन अनिवार्य बस्नुपर्ने छ,’ उनले भने । कान्तिपुर दैनिकबाट