एमाले संसदीय दलको बैठक : यी पाँच सांसदले खाली कागजमा हस्ताक्षर गर्न अस्वीकार गरे

काठमाडौं । प्रमुख प्रतिपक्ष दल नेकपा एमालेको संसदीय दलको बैठकमा पाँच सांसदले खाली कागजमा  हस्ताक्षर गर्न अस्वीकार गरेका छन् ।

एमाले सांसदहरू भीमबहादुर रावल, घनश्याम भुसाल, पवित्रा निरौला खरेल, झपटबहादुर रावल र दीपकप्रकाश भट्टले खाली कागजमा हस्ताक्षर गर्न अस्वीकार गरेका हुन् । उनीहरुले प्रतिशोधको राजनीति गर्न नहुने भन्दै हस्ताक्षर गर्न अस्वीकार गरेको जनाएका छन् ।संघीय संसद् भवन नयाँ बानेश्वरमा सोमबार बसेको संसदीय दलको बैठकमा चार फाइलमा राखिएका खाली कागजमा छुट्टाछुट्टै हस्ताक्षर गराइएको थियो ।ती कागजमा हस्ताक्षर गर्न रावलले लिखितरूपमा नै असहमति राखेका थिए । अन्य चार सांसदले पनि त्यसमा मौखिक कुरा राख्दै हस्ताक्षर गर्न अस्वीकार गरेका थिए ।

एमाले प्रमुख सचेतक विशाल भट्टराईले बैठकमा नेतृत्वले सोच विचार गरेर मात्रै यसरी गराइएको हस्ताक्षरको प्रयोग गर्ने बताएका थिए । तर, पाँच सांसदले भने त्यसलाई अस्वीकार गरेका हुन् ।

संसदीय दलको बैठकमा सांसद महेश बस्नेतले भने सभामुख अग्निप्रसाद सापकोटाविरुद्ध अविश्वासको प्रस्ताव लानुपर्ने प्रस्ताव गरेका थिए । यद्यपी हस्ताक्षर गरेकै केही सांसदहरुले भने नेतृत्वलाई प्रतिशोधको राजनीति नगर्ने आग्रह गरेका थिए । हस्ताक्षर गरेका कृष्णभक्त पोखरेल, लालबाबु पण्डित, मोहन बानियाँ, विमला विकलगायतले यस्तो आग्रह गरेका हुन् ।

सांसदहरुले सत्ता गठबन्धनले प्रधानन्यायाधीश चोलेन्द्रशमशेर जबराविरुद्ध लगाएको महाअभियोग र अमेरिकी सहयोग परियोजना मिलिनियम च्यालेन्ज कर्पोरेसन ९एमसीसी०मा उक्त हस्ताक्ष प्रयोग हुने संकेत गरेका थिए ।