बिचौलिया बस्नेत सम्पत्ति शुद्धीकरणको अनुसन्धानमा, पासपोर्ट रोक्का

काठमाडौं । नेपाल प्रहरीको केन्द्रीय अनुुसन्धान ब्यूरो(सीआईबी)ले गएको असोज २३ गते पक्राउ गरी धरौटीमा छुटेका बिचौलिया नवीनराज बस्नेतमाथि सम्पत्ति शुद्धीकरण अनुसन्धान बिभागले पनि अनुसन्धान सुरु गरेको छ ।

१३ वर्षअघिको रक्तचन्दन तस्करीको घटनामा संलग्न भएका ठेक्काका बिचौलिया बस्नेतको राहदानी(पासपोर्ट) समेत बिभागले रोक्का गरेको छ । बिभाग स्रोतका अनुुसार बस्नेत बिदेश भाग्न सक्ने आशंकामा उनको पासपोर्ट रोक्का गरी अनुसन्धान भइरहेको छ ।

१३ बर्षअघि उनलाई वतन नखुलेको भन्दै रक्तचन्दन तस्करीमा मुद्दा चलाइएको थिएन । रक्तचन्दन बरामद भएको ट्रकका चालक र सहचालक भने जेल चलान भएका थिए ।

नेकपाका सांसद तथा पूर्व सहरी विकास मन्त्री धनबहादुर बुढादेखि क्षमादेवी ग्रुुपका राजकुमार बस्नेत र समानान्तर निर्माण सेवाका अच्यूतप्रसाद खरेललाई विमानस्थलका ठूला ठेक्कापट्टा, भवनहरुको टेण्डरमा सेटिङ गरी अथाह लाभ लिएका उनी पछिल्ला दिनमा रास्वपा सरकार आएपछि प्रधानमन्त्री वालेन्द्र शाहका निकट कुमार बेनससम्म पहुँच राख्न सफल भइसकेका थिए । रास्वपाका केही सांसद र मिडियाका ब्यक्तिमार्फत् उनी बेनसम्म पुगेका थिए ।

नेपाल नागरिक उड्डयन प्राधिकरणका निलम्बित महानिर्देशक प्रदीप अधिकारीसँग मिलेर उनले सेटिङमा ठेक्का लिने गरेका थिए । अधिकारी भ्रष्टाचार मुद्दामा तानिएपछि बस्नेतले शक्तिकेन्द्रमार्फत् मुद्दा मिलाइदिने भन्दै करोडौँको डिल गरेका थिए । डिल नमिलेपछि विदेशमा रहेका प्रकाश पाठक र त्रिशुल बाबामार्फत् अख्तियारका पदाधिकारीलाई नै धम्क्याउने कामसमेत गरेको आरोप लाग्दैआएको छ ।