बाढी प्रभावित जलविद्युत् आयोजनामा उद्धारबारे ऊर्जा मन्त्री र गृहमन्त्रीबीच त्रिशूलीमा छलफल

काठमाडौँ। बाढीबाट प्रभावित जलविद्युत् आयोजनामा भइरहेको उद्धार तथा व्यवस्थापन कार्यको अवस्थाबारे जानकारी लिन ऊर्जा, जलस्रोत तथा सिँचाइ मन्त्री बिराजभक्त श्रेष्ठ नुवाकोटको त्रिशूली पुगेका छन्।

मन्त्री श्रेष्ठले त्रिशूलीस्थित सैन्य तालिम केन्द्रमा गृहमन्त्री सुधन गुरुङसँग उद्धार कार्यको समन्वय तथा पछिल्लो अवस्थाबारे छलफल गरिरहेका छन्। गृहमन्त्री गुरुङ पनि सोही केन्द्रबाट उद्धार अभियानको समन्वयमा सक्रिय छन्।

जलविद्युत् आयोजनाका सुरुङमा खोज तथा उद्धारका लागि परिचालित नेपाली सेनाका उच्च अधिकारीहरूले मन्त्री श्रेष्ठलाई हालसम्मको प्रगति तथा उद्धार प्रयासबारे जानकारी गराएका छन्। प्रधानमन्त्रीका राजनीतिक सल्लाहकार असिम शाहसमेत मन्त्री श्रेष्ठसँगै नुवाकोट पुगेका छन्।

त्रिशूलीमा सुरक्षा अधिकारीबाट आवश्यक जानकारी लिएपछि मन्त्री श्रेष्ठ हेलिकप्टरबाट रसुवाका बाढी प्रभावित जलविद्युत् आयोजना तथा उद्धार भइरहेको स्थलको स्थलगत निरीक्षणमा जाने कार्यक्रम रहेको छ। त्यस क्रममा उनले विपद्बाट प्रभावित तथा बेपत्ता व्यक्तिका परिवारसँग समेत भेटेर अवस्थाबारे जानकारी लिने तयारी गरिएको छ।