डोल्पाबाट स्रोत नखुलेको ५५ लाख ९० हजारसहित २ जना पक्राउ

डोल्पा । डोल्पामा स्रोत नखुलेको स्रोत नखुलेको ५५ लाख ९० हजार नेपाली रुपैयाँ नगद सहित दुई जना पक्राउ परेका छन्। त्रिपुरासुन्दरी नगरपालिका–१ त्रिपुराकोट बजारस्थित भेरी करिडोर सडक खण्डमा गरिएको संयुक्त सुरक्षा चेकिङका क्रममा प्रहरीले उनीहरूलाई नियन्त्रणमा लिएको हो।

जिल्ला प्रशासन कार्यालय डोल्पाका प्रतिनिधिको उपस्थितिमा जिल्ला प्रहरी कार्यालय डोल्पाबाट प्रहरी निरीक्षकको कमाण्डमा खटिएको ११ जना र सशस्त्र प्रहरी बल नेपाल नं.४६ गुल्म हे.क्वा. डोल्पाबाट सशस्त्र प्रहरी निरीक्षकको कमाण्डमा खटिएको १० जनाको संयुक्त सुरक्षा टोलीले चेकजाँच गर्ने क्रममा उक्त रकम फेला पारेको हो।

प्रहरीका अनुसार दुनैबाट छलतर्फ जाँदै गरेको भे १३ प ९२६५ नम्बरको मोटरसाइकललाई रोकेर चेकजाँच गर्दा चालक जिल्ला डोल्पा त्रिपुरासुन्दरी नगरपालिका वडा–७ छल बस्ने वर्ष ३२ को बिष्णुलाल रोकाय र उक्त मोटरसाइकलको पछाडि सवार सोही ठाउँ बस्ने वर्ष ४२ को भक्ती चन्द्र रोकायको साथबाट उक्त रकम बरामद भएको हो।

बरामद गरिएको रकमको वैधानिक स्रोत खुलाउन नसकेपछि प्रहरीले दुवै जनालाई मोटरसाइकल र नगद सहित नियन्त्रणमा लिएको छ। पक्राउ परेकाहरूमाथि कानुन बमोजिम थप अनुसन्धान कार्य भइरहेको जिल्ला प्रहरी कार्यालय डोल्पाका सूचना अधिकारी एवं प्रहरी निरीक्षक विनय कुमार सिंहले जानकारी दिए ।