अर्थमन्त्रालयमा ज्वाइँसाव र भाइभारदारहरूकै रजगज, सक्षम मन्त्रीलाई ‘नेपोबेबी’ नै किन चाहियो ?

विष्णुप्रसाद होमागाई

काठमाडौं । ‘नेपोबेबी’ भन्दै शासन ब्यवस्थामा आमूल परिवर्तन गर्नका लागि आएको भनिएको नयाँ दल रास्वपाको सरकारमा झनै ‘नेपोबेबी’ हरू हावी भइरहेका छन् ।

ससुराहरु आफू पदमा पुगेपछि ज्वाइँहरुलाई उचित स्थान दिने प्रचलन नेपालमा मात्रै नभएर विश्वको महाशक्ति अमेरिकामा पनि कायमै छ । डोनाल्ड ट्रम्पका चर्चित छोरीज्वाइँ (इभान्का ट्रम्पका पति) जारेड कुश्नर को ट्रम्पको पहिलो कार्यकाल (२०१७–२०२१) मा ह्वाइट हाउसमा वरिष्ठ सल्लाहकारको रूपमा काम गरेका थिए ।

गिरिजाप्रसाद कोइराला प्रधानमन्त्री भएका समयमा ज्वाइँ (सुजाताका पति) जर्मनी नागरिक जोष्टले रजगज गरे । उनले ठेक्का मिलाइदिने काम गरे । जोष्टले तत्कालीन शाही नेपाल बायुसेवा निगमका लागि युरोपका जीएसए दिलाउन आफ्ना साथी भारतीय नागरिक दिनेश धमिजालाई तिब्र दवाव दिए । जुन धमिजा काण्डका रुपमा चर्चित भएको थियो ।

नेपालका अर्थमन्त्री डा. स्वर्णिम वाग्लेले बहिनीज्वाइँ गोरखाका खोम अधिकारीलाई स्वकीय सचिव बनाएर सरुवा, बढुवा, नियुक्ति र थमौतिका लागि डिफ्याक्टो अर्थमन्त्री नै बनाएका छन् । त्यसो त चालकका रुपमा काम गर्दै आएका अर्का नातेदार दिनेश खनालले क्याफेमा सरुवा मिलाएर मालदार कार्यालयमा पठाउनेमा नम्बर एक भएका तनहुँका कांग्रेसहरुले चर्चा गर्न थालेका छन् ।

सरुवाका लागि दिनेशको चरणमा पुग्नुपर्ने कर्मचारीको बाध्यता छ । अर्थमन्त्रीको नामको मोबाइल उठाउने गरेका ज्वाइँ खोम अधिकारीले चाहिँ आफूलाई निजी सचिव भनेर परिचय दिने गरेका छन् । अर्का हर्ताकर्ता प्रकाश वाग्ले पनि अर्थमन्त्री स्वर्णिमका काकाका छोरा हुन् । उनले पनि सहोदर भाइ भनेर चिनाउने गरेका छन् । वाग्लेले आइजीपी दानबहादुर कार्कीलाई निर्देशन दिने गर्दछन् । उनले प्रहरीका एसपी र एसएसपीहरु सरुवा गर्ने र मालदार अड्डामा पठाउने गरेको तनहुँ र गोरखाका कांग्रेस नेताहरु बताउँछन् । अर्थमन्त्रीका कान्छा भाइ संयम वाग्ले अष्ट्रेलियामा बस्छन् भने माहिला भाइचाहिँ चितवनको टाँडीमा होटल व्यवसाय गरि बस्दै आएका छन् ।

यसअघिका नेताका भाइ–छोराहरु विदेशमा बसेर राजनीतिक नियुक्तिमा लेनदेनका कारोबार उतैबाट चलाउने गरेका थिए । भियतनामी श्रीमती विवाह गरिबसेका अर्थमन्त्री स्वर्णिमले नेपाली कांग्रेसमा रहेर छोटो समयमा धेरै महत्वपूर्ण अवसर पाए । अहिले काकाका छोरा प्रकाश वाग्लेले तनहुँमा बसेर स्थानीय तहको निर्वाचनका लागि पदको बाँडफाँड गरिसकेका छन् ।

त्यो कुरा रास्वपाका सभापति रवि लामिछानेलाई पनि थाहा छैन । उनले भानु नगरपालिकाका रास्वपाका सभापति विष्णु पोखरेललाई नगरप्रमुख पदको उम्मेदवार भनेर ललीपप दिएको अर्थमन्त्रीका सचिवालयमा काम गरेका एकजना व्यक्तिले यो प्रतिनिधिसँग खुलासा गरे । अर्थमन्त्री वाग्ले २०७४ साल साउन १९ गते नेपाली कांग्रेसको सरकारका कार्यकालमा योजना आयोगका उपाध्यक्ष बनेका थिए । त्यसअघि काग्रेसको सरकारमा रहेका प्रा.डा. गोविन्दराज पोखरेल राष्ट्रिय योजना आयोगको उपाध्यक्ष हुँदा उनी सदस्य बनेका थिए ।

पहिला राष्ट्रपति पौडेलका हर्ताकर्ता, अहिले रास्वपाका कर्ताधर्ता

तनहुँ कांग्रेसका सचिव भई राष्ट्रपति रामचन्द्र पौडेलका हर्ताकर्ता भएर करोडौं रुपैयाँको सम्पत्ति जोड्न सफल विश्व बास्तोला अहिले रास्वपा तनहुँका संयोजक छन् । उनले राष्ट्रपति पौडेलले संघीय संसद सदस्यका लागि निर्वाचनमा उम्मेदवार हुँदा आर्थिक संयोजक भएर अकूत सम्पत्ति जोडेको आरोप छ । बास्तोलाले दमौलीबाट घुमाउने पुल जाने बाटोको अध्यक्ष भएर ठेकेदारसँग करोडौं रुपैया कमिसन लिएको स्थानीय कांग्रेसका नेताहरु बताउँछन् ।

कमिसनकै मोहमा उनी बुद्धसिंहमार्ग बाटो निर्माणमा ९ वर्ष अध्यक्ष बनेका थिए । यसरी पौडेलका नाममा करोडौं आर्थिक लाभ लिएका बास्तोला र टीका लगाएर सधैं राजनीतिक नियुक्तिको अवसर प्राप्त गरेका डा. वाग्लेले अहिले राष्ट्रपति पौडेलको आलोचना गरेको सुन्दा तनहुँका रामचन्द्र पोखरेललगायतका कांग्रेसहरुले लाजले कानमा कपास राखेको अवस्था छ । बास्तोला ब्यास नगरपालिकाको प्रमुख पदमा टिकट नपाएपछि रास्वपामा लागेका थिए ।

अर्थमन्त्री वाग्लेले रास्वपामा गएर नयाँ जोगी बन्दै खरानी घसेको रमिता पूर्व गृहमन्त्री गोविन्दराज जोशी र उनका छोरा दीपकराज जोशीले नजिकबाट हेरेका छन् । रामचन्द्र पौडेल राष्ट्रपति बन्नका लागि राजीनामा दिएर खाली भएको उपचुनावमा चाहिँ उनीहरुकै सहयोग र समर्थनका कारण वाग्लेले जित हासिल गरेका थिए ।

छोराका नाममा बाबु जीवनराजको अनेक धन्दा

चन्द्रागिरी नगरपालिका वडा नम्बर ८ मा बस्दै आएका अर्थमन्त्री डा. स्वर्णिम वाग्लेका बाबु जीवनराज वाग्लेले आफ्नो जग्गा बिक्री गर्ने भनी एक जना व्यवसायीसँग करार कागज गरी ५० लाख बैना लिए । उनले बैना रकम लिएपछि कान्छो छोरा सम्यमलाई अष्ट्रेलियामा भेटेर आएपछि राजीनामा पास गरिदिन्छु भन्दै टार्दै आए । सहकारी संस्थाबाट ऋण लिएर घडेरी किन्न भन्दै ५० लाख बुझाएका व्यवसायीलाई छोराको शक्ति देखाएर जीवनराजले ३८ महिनासम्म झुलाएर हायलकायल गराए । उनले घडेरी विक्री नगर्ने नियतले अनेकौं समस्या अघि सारे ।

चन्द्रागिरी नगरपालिका–८ वडाका अध्यक्षसँग उजुरी गरेपछि पीडित व्यवसायीले बल्लतल्ल साँवा मात्रै फिर्ता गराउन सफल भए । यसबारेमा प्रतिक्रियाका लागि जीवनराजसँग सम्पर्क गर्दा कान्छी श्रीमती दिलु वाग्लेले बिनाब्याज रकम फिर्ता गरिसकेको बताइन् । जग्गा किन्नका लागि भन्दै सहकारीबाट ऋण लिएर ५० लाख बैना दिएका व्यवसायीको ब्याजमात्रै झण्डै ३० लाख पुगेको अवस्था छ । यस विषयमा अर्थमन्त्री वाग्लेको मोबाइल नम्बरमा सम्पर्क गर्दा उनका ज्वाइँ खोम अधिकारीले निजी सचिव हुँ, सबै कुरा मलाई थाहा छ, गल्ती व्यवसायीकै हो भन्दै धम्कीपूर्ण भाषामा प्रतिक्रिया दिए ।

कहीँ नभएको जात्रा, अर्थमन्त्रीबाट नीति तथा कार्यक्रममा जवाफ

रास्वपाका बरिष्ठ नेता बालेन्द्र शाहले अहिलेसम्म निरन्तर गरेको पाँच मिनेटको सम्बोधन कतै सुनिँदैन । प्रधानमन्त्री बालेनको अनुपस्थितिमा अर्थमन्त्री वाग्लेले विदेश जाँदा वा बिरामी हुँदा मात्रै गर्नुपर्ने सम्बोधन गरी जात्रा नै देखाएका छन् । बिपक्षी दलहरुले वाग्लेको सम्बोधनलाई लिएर तीव्र विरोध गरे । तर प्रतिपक्ष दलहरुको विरोधका बाबजुद गैर लोकतान्त्रिक ढंगले सदन चलाइएको थियो । २०८३ जेठ ४ गतेको डायरी एक्सप्रेस साप्ताहिकबाट साभार