सामाजिक संजालमा आलोचना गरेपछि आशिका तामाङलाई स्पष्टीकरण सोध्ने रास्वपाको तयारी

राष्ट्रिय स्वतन्त्र पार्टी (रास्वपा) आफ्नै पार्टीकी सांसद आशिका तामाङलाई अनुशासनको कारबाही गर्ने तयारी गरेको छ । रास्वपाले शनिबार ललितपुरको स्टाफ कलेजमा आयोजना गरेको संसदहरुको प्रशिक्षण कार्यक्रमको बिरोधमा सामाजिक संंजालमा लेखेपछि उनलाई पार्टीले स्पष्टीकरण सोध्ने भएको छ ।

सांसदहरुको प्रशिक्षण कार्यक्रममा आशिका उपस्थित नभएको र स्थानको विषयलाई लिएर सामाजिक सञ्जालमार्फत् उनले सार्वजनिक रूपमा असन्तुष्टि जनाउँदै लेखेकी थिएन् ।

ललितपुरको जावलाखेलस्थित स्टाफ कलेजमा रास्वपाले ‘सक्षम सांसद, सशक्त संसद्’ नामक दुई दिने प्रशिक्षण कार्यक्रममा सांसद तामाङसहित केही सदस्य अनुपस्थित थिए । सांसदहरुको प्रशिक्षण जारी रहँदा उनले सामाजिक सञ्जालमा एक पोस्ट गर्दै सिंहदरबारभित्रै पर्याप्त सरकारी हलहरू हुँदाहुँदै बाहिर महँगो शुल्क तिरेर कार्यक्रम गरिएको भन्दै आपत्ति जनाएकी थिइन् ।

तामाङले फजुल खर्चको विरोध गर्दै नयाँ भनिएको पार्टीको व्यवहार पनि पुराना दलहरू जस्तै भएको भन्दै आलोचना गरेकी थिइन् ।
स्टाफ कलेज जस्तो सरकारी प्रशिक्षण केन्द्रलाई पाँचतारे होटलसँग तुलना गरी भ्रम फैलाएको र पार्टीको अनुशासन उल्लंघन गरेको ठहर गर्दै रास्वपाले उनलाई स्पष्टीकरण सोध्न लागेको बताइएको छ ।

रास्वपा स्रोतका अनुसार विषयको गाम्भीर्यता नबुझी र कार्यक्रममा सहभागी नै नभई सार्वजनिक टिप्पणी गरेको भन्दै तामाङलाई स्पष्टीकरण सोध्न लागिएको बताइएको छ । प्रशिक्षण कार्यक्रममा सांसदहरूको उपस्थिति नै न्यून भएका बेलामा तामाङको यो टिप्पणीले पार्टीभित्रको आन्तरिक कलहलाई सतहमा ल्याइदिएको छ।