बालेन ओलीसँग डिबेटमा नबस्ने, विवादास्पद मालपानीको डिफेन्डर गाडीबारे केही बोलेनन्

काठमाडौं । राष्ट्रिय स्वतन्त्र पार्टीका वरिष्ठ नेता बालेन्द्र साहले नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीसँग सार्वजनिक बहस(पब्लिक डिबेट) मा नबस्ने बताएका छन् ।

ओलीले सामाजिक संजालमार्फत् आइतबार बिहान सार्वजनिक बहसमा बस्न चुनौती दिएपछि बालेन्द्रले तुरुन्तै कडा प्रतिक्रिया जनाएका छन् । उनले सिंहदरबारदेखि भौतिक संरचना जलाएको स्वीकार गरे पनि विवादित व्यापारी कमलकिशोर मालपानीबाट ८ करोड मूल्यको डिफेन्डर गाडी चढेको विषयमा भने केही बोलेका छैनन् । सामाजिक संजालमा मालपानीसँग उपहार लिएर गाडी चढेको बिषयमा बालेन्द्रको आलोचना भए पनि उनले अहिलेसम्म मौनता साँधेका छन् ।

बालेन्द्रले ओलीको जवाफ दिंदै सामाजिक संजालमा लेखेका छन्–‘७६ जना बच्चाको हत्यारा र उसको मतियारसँग एउटै मञ्चमा उभिनु भनेको म पनि त्यसमा सामेल भएको बुझिनेछ।’ बालेनको यो अभिव्यक्तिलाई उनले पब्लिक डिबेट अस्वीकार गरेको संकेतका रूपमा हेरिएको छ ।

ओलीलाई तुरुन्तै यस्तो जवाफ फर्काएर सामाजिक सञ्जालमा सक्रिय देखिएका बालेन विवादित व्यापारी कमलकिशोर मालपानीको करिब ८ करोड रुपैयाँ मूल्य पर्ने गाडीमा सवार भएको विषयमा भने हालसम्म मौन छन् ।

करोडौँ रुपैयाँ कर छलीमा मुछिएका मालपानीको गाडी किन प्रयोग गरियो भन्ने प्रश्न सामाजिक सञ्जाल र राजनीतिक वृत्तमा उठिरहेको छ । चुनावी प्रचारका क्रममा प्रयोग गरिएको गाडीको विषयलाई लिएर बालेनको पारदर्शितामाथि समेत प्रश्न उठ्न थालेको छ ।

मालपानीको नागरिकताको विषय पनि छानबिनमा छ । उनै व्यक्तिले बालेनलाई करिब ८ करोड रुपैयाँ मूल्य पर्ने गाडी चुनावी प्रचारका लागि दिएका छन् । मालपानीले नक्कली बाबु बनाएर नेपाली नागरिकता लिएको बिषय छानबिनमा छ ।

झापा–५ मा मनोनयन दर्ता गरी ६ दिन पूर्वी नेपाल भ्रमण गरेका बालेन शनिबार राति काठमाडौं फर्किएका थिए । विमानस्थलबाट रातो रङको टेस्ला गाडी चढेर बालेन बाहिरिएका थिए । उक्त गाडी एमालेकै युवा नेता एवं अनेरास्ववियुका पूर्व अध्यक्ष डा. सुजन कडरियाको रहेको चर्चा छ ।

बालेनलाई लिन कडरियाका माइला भाइ सुशील कडरिया बागमती प्रदेश ४४०६ नम्बरको रातो टेस्ला लिएर विमानस्थल पुगेको समाचार सार्वजनिक भएका छन् ।