सरकारी वार्ता टोलीले आज रास्वपा, राप्रपा र जनमतसहितका पार्टी कार्यालयमा अनुगमन र संवाद गर्ने

काठमाडौं । सरकारले राजनीतिक दलहरूसँग वार्ता तथा संवादलाई तीव्रता दिएको छ । आगामी फागुन २१ गते हुन गइरहेको प्रतिनिधिसभा सदस्य निर्वाचनको वातावरण बनाउन सरकारले दलहरूसँगको वार्ता तथा संवादलाई तीव्रता दिएको हो ।

सोही क्रममा सरकारले गठन गरेको उच्चस्तरीय राजनीतिक संवाद समितिले आज बुधबार राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा) र जनमत पार्टीको केन्द्रीय कार्यालय अनुगमन गर्दै नेताहरूसँग छलफल गर्ने भएको छ ।

समितिको कार्यतालिकाअनुसार बिहान ११ बजे जनमत पार्टी, दिउँसो १ बजे राप्रपा र दिउँसो ३ बजे रास्वपाको कार्यालयमा पुगेर अनुगमन तथा संवाद गरिनेछ ।

कानून, न्याय तथा संसदीय मामिलामन्त्री अनिलकुमार सिन्हाको संयोजकत्वमा गठित समितिमा सञ्चार तथा सूचना प्रविधिमन्त्री एवं सरकारका प्रवक्ता जगदीश खरेल र प्रधानमन्त्रीका प्रमुख राजनीतिक सल्लाहकार अजयभद्र खनाल सदस्य छन् ।

सरकारका प्रवक्ता खरेलले निर्वाचनको माहोल बनाउन चरणबद्ध राजनीतिक वार्ता र संवादलाई निरन्तरता दिइएको बताए ।

यसअघि मंगलबार समितिले नेपाली कांग्रेस, नेकपा एमाले र नेपाल कम्युनिस्ट पार्टीको केन्द्रीय कार्यालय पुगेर अनुगमन तथा नेताहरूसँग वार्ता गरिसकेको छ ।