मधेशमा शक्ति प्रदर्शन गर्दै नेकपा, आज जनकपुरमा एकता सन्देश सभा

काठमाडौँ । नेपाली कम्युनिष्ट पार्टी (नेकपा) ले आज धनुषाको जनकपुरमा एकता सन्देश सभा गर्दैछ । एकता सभामा नेकपाले ब्यापक जनसहभागिता गराउने भएको छ ।

धनगढी, दाङ, पोखरा र विराटनगरमा सभा गरिसकेको नेकपाले जनकपुरको तिरहुतियामा आज मधेश प्रदेशस्तरीय एकता सन्देशसभा आयोजना गर्न लागेको हो ।

सभामा पार्टीका केन्द्रीय संयोजक पुष्पकमल दाहाल ‘प्रचण्ड’, सहसंयोजक माधवकुमार नेपाललगायतका शीर्षनेताहरूले सम्बोधन गर्नेछन् । सभामा प्रदेशभरबाट ४० हजारभन्दा बढी नेता–कार्यकर्ता उपस्थित गराउने तयारी भइरहेको छ ।

नेकपाले २७ गते सुर्खेतमा सभा गर्दैछ । यसअघि मंसिसर २३ गते मकवानपुरको हेटौँडामा सभा ससमापन गर्ने तयारी गरिए पनि यो मिति सारिएको छ ।
नकोपाले बागमतीमा पनि सबै जिल्लाको प्रतिनिधित्व हुनेगरी काठमाडौं उपत्यकामै भेलाको तयारी भइरहेको छ ।