पर्सामा एक सय ४ किलो गाँजासहित कार बरामद, २ जना पक्राउ

बीरगंज । इलाका प्रहरी कार्यालय पटेर्वा सुगौलीको टोलीले १ सय ४ किलो ३२५ ग्राम गाँजा बरामद गरेको छ ।

सोमबार अपराह्न सवारी साधन तथा पैदल यात्रुहरुलाई चेकजाँच गर्ने क्रममा मनवाबाट रंगपुरतर्फ जाँदै गरेको बीएबी ९३९८ नम्बरको कार रोकेर चेक गर्ने क्रममा उक्त गाँजा बरामद गरेको हो । प्रहरीले गाँजासहित २ जनालाई पक्राउ गरेको छ ।

पक्राउ पर्नेहरुमा मकवानपुरको भीमफेदी गाउँपालिका–८ बस्ने ३२ बर्षीय भीम स्याङ्तान र मकवानपुरगढी–१ बस्ने ३८ बर्षीय कुमार स्याङ्तान छन् । पक्राउ परेका २ जनामध्ये भीम स्याङ्तान कारचालक हुन् । पक्राउ परेकाहरुका बिरुद्ध लागूऔषध सम्बन्धी कसूरमा थप अनुुसन्धान भइरहेको मंगलबार कार्कीले जारी गरेको विज्ञप्तिमा उल्लेख छ ।

जिल्ला प्रहरी कार्यालय पर्साका प्रवक्ता डीएसपी राजु कार्कीका अनुसार पटेर्वा सुगौली गाउँपालिका रंगपुरबाट लागूऔषध ओसारपसार भइरहेको बिशेष सूचनाका आधारमा प्रहरी टोली खटिएको थियो ।

प्रवक्ता कार्कीका अनुसार प्रहरीले बीरगंज महानगरपालिका वडा नं. १५ प्रतिमाचोकमा सडकमा हिंडिरहेका एक ब्यक्तिबाट मंगलबार १० किलो चरेस बरामद गरेको छ ।

पर्साको धोबिनी गाउँपालिका ५ का ४८ बर्षीय सम्सुल मियाँको साथमा रहेको कालो ब्याग चेक गर्दा उक्त चरेश फेलपरेको थियो । मियाँलाई नियन्त्रणमा लिएर लागूऔषध कसुरमा अनुसन्धान भइरहेको छ ।
।