नेतृ झाँक्रीकाे निवास अगाडि नाराबाजीः रामकुमारी झाँक्री हाईहाई – केपी ओली बाईबाई

काठमाडौं । नेपाल कम्युनिस्ट पार्टी (नेकपा) पुष्पकमल दाहाल प्रचण्ड–माधबकुमार नेपाल समूहकी नेतृ रामकुमारी झाँक्रीको बानेश्वरस्थित घर वरिपरि प्रहरीले घेरा हालेको छ । उनकाे घर अगाडि प्रहरी र नेकपाका कार्यकर्ताहरुको बाक्लो उपस्थिती रहेको छ।

प्रहरीको भिडकैबीच नेकपाका कार्यकर्ताहरुले राष्ट्रपति विद्या भण्डारी र प्रधानमन्त्री केपी शर्मा ओलीबिरुद्द चर्का नाराबाजी गरेका छन्।

उनीहरूले रामकुमारी झाँक्री हाइहाइ-केपी ओली बाइबाइ, खड्के चाेर-देश छाेड, सक्छस भने गाेली ठाेक, छाति थाप्न तयार छाैं लगायतका नारा लगाएका छन् ।

महानगरिय अपराध महाशाखा झाँक्रीलाई घरभित्रै गएर नियन्त्रणमा लिने तयारी गरेकाे छ । प्रधानमन्त्री केपी शर्मा ओलीको दबाबमा नेतृ झाँक्रीलाई प्रहरीले नियन्त्रणमा लिन लागेको हो ।

झाँक्रीले गोरखामा राष्ट्रपति विद्या भण्डारीलाई बडामहारानीको संज्ञा दिंदै भनेकी थिइन्–‘राष्ट्रपतिका कुरा त के गर्नु, म बडामहारानीलाई गोरखाबाटै सन्देश दिन चाहन्छु निर्वाचनको तयारीका लागि सुविधा छाडेर आउनुस् ।

शीतलनिवास छाडेर पहिला कोटेश्वर आउनुस्, चावहिल कि कता बानेश्वरतिर बसाइ छ भन्ने सुन्या छु,’ झाँक्रीले भनेकी थिइन्–‘होइन भने बालकोटै गए पनि हुन्छ ।’