प्रदेश प्रमुख अचानक बिरामी, बागमतीका नवनियुक्त ३ मन्त्रीको सपथ स्थगित

हेटौँडा । मुख्यमन्त्री बहादुरसिंह लामाले संसदीय दलमा बहुमत गुमाइसकेपछि नियुक्त गरेका बागमती प्रदेश सरकारका नवनियुक्त तीन मन्त्रीको शपथग्रहण कार्यक्रम अनिश्चितकालका लागि स्थगित गरिएको छ ।

बागमतीका प्रदेश प्रमुख दीपकप्रसाद देवकोटा अचानक बिरामी परेको बिज्ञप्ति बिहीबार जारी गरी तीन मन्त्रीको सपथ अनिश्चितकालका लागि स्थगित गरिएको छ ।

बिहीबार दिउँसो १ बजेका लागि तय गरिएको शपथग्रहण कार्यक्रम प्रदेश प्रमुख देवकोटाको स्वास्थ्यमा समस्या आएको भन्दै स्थगन गरिएको हो । बुधबार प्रदेश प्रमुख देवकोटाले सपथ ग्रहण गराउने भने पनि बिहीबार बिहान उनी बिरामी भम्एको विज्ञप्ति प्रदेश प्रमुखको कार्यालयले जारी गरेको छ ।

मुख्यमन्त्री बहादुरसिंह लामाले बुधबार मात्रै मन्त्रिपरिषद् पुनर्गठन गर्दै गोविन्द लम्साललाई आन्तरिक मामिला तथा कानुन, गीता गुरुङलाई सहकारी तथा गरिबी निवारण, र माया श्रेष्ठलाई युवा तथा खेलकुद मन्त्रीमा नियुक्त गरेका थिए ।

एमालेको निर्णयले मन्त्रीहरुको सपथ रोकिएको बताइएको छ । बागमतीमा कांग्रेस–एमालेको संयुक्त सरकार छ ।

शपथ स्थगनलाई लिएर पछिल्लो समय बागमती प्रदेशमा चुलिएको राजनीतिक तनाव थप जटिल बन्ने देखिएको छ ।

यसैबीच, बुधबार बागमती कांग्रेस संसदीय दलको नेतामा भएको निर्वाचनमा इन्द्रबहादुर बानियाँ विजयी भएका थिए । पार्टीको संसदीय दलको नेतामा पराजीत भए पनि मुख्यमन्त्री लामा भने पद नछोड्ने अडानमा रहेका छन् । उनलाई कांग्रेसको डा. शेखर कोइराला पक्षले साथ दिएको छ ।

प्रदेश प्रमुखको सचिवालयले जारी गरेको विज्ञप्ति