छानबिनपछि गल्ती देखिए जस्तोसुकै सजाय भोग्न तयार छु: सभापति खतिवडा

काठमाडौं । प्रतिनिधि सभाको राज्य व्यवस्था तथा सुशासन समितिका सभापति रामहरि खतिवडाले छानबिनपछि आफूमा गल्ती देखिएको पाइए जस्तोसुकै कारबाही भोग्न तयार रहने बताएका छन्। आज बसेको समिति बैठकमा उनले यस्तो बताएका हुन्।

उनले भने,‘कुलिङ परियडको व्यवस्था उल्ट्याउने काम भएको छ,यसको लागि सत्य तथ्य पत्ता लगाउन उच्च स्तरीय छानबिन समिति गठन गर्नुपर्छ,छानबिनपछि गल्ती भए म जस्तोसुकै सजायको भागी बन्न तयार छु।’

उनले पछिल्लो समय आफूमाथि आक्रमण भएको पनि बताए। समितिले छानबिन गर्न समिति गठन गर्ने निर्णय गरेको छ। प्रतिनिधिसभाबाट आइतबार पारित ऐनमा सांसद र संसद्लाई नै झुक्याएर उच्च प्रशासकका हकमा कुलिङ पिरियड लागू नहुने गरी शब्द थपिएको छ।

विशिष्ट र प्रथम श्रेणीका लागि राखिएको व्यवस्थामा ‘बाहेक’ शब्द थपिएपछि उच्च पदस्थहरूलाई फेरि घुमाएर सहुलियत दिइएको छ। जसकारण भित्री रूपमा गरिएको यो चलखेलले सार्वभौम संसद्को हुर्मत लिएको छ।