जिल्लाको फैसला उल्टाउँदै अफ्ताव आलमलाई उच्च अदालतले दियो सफाइ

काठमाडौं । हत्या आरोपमा जन्मकैदको संजाय पाएका नेपाली कांग्रेसका नेता तथा पूर्वमन्त्री मोहम्मद अफ्ताव आलमलाई उच्च अदालत बीरगंजले सफाइ दिएको छ ।

उच्च अदालत बीरगंजका न्यायाधीशद्वय खुशीप्रसाद थारु र अर्जुन महर्जनको संयुक्त इजलासले बिहीबार रौतहट जिल्ला अदालतको फैसला उल्टाउँदै आलमलाई सफाइ दिएको हो ।

बम विस्फोट गरी व्यक्ति हत्या गरेको आरोपमा जन्मकैद सजाय पाएका नेपाली कांग्रेसका नेता तथा पूर्वमन्त्री मोहम्मद अफताव आलमलाई उच्च अदालतले सफाइ दिएको छ । अफ्तावलाई २०८१ वैशाख १३ गते जिल्ला अदालत रौतहटले जन्मकैदको सजाय सुनाएको थियो ।

अफ्तावमाथि पहिलो संविधानसभा निर्वाचन २०६४ मा बम पड्केर घाइते भएका पाँचजनालाई ईंटाभट्टामा जिउँदै जलाएर बर्बरतापूर्वक मारेको आरोप समेत छ । आलम २०७६ मा पक्राउ परेका थिए ।
आलमका भाइ मोहम्मद मोहताब आलम, सेख सराज र बद्री सहनीलाई पनि जन्मकैदको सजाय सुनाइएको थियो । सहनी इँटाभट्टाका लेखापाल(मुन्सी) थिए ।